An hmatawng tih chak nan Manchester United chuan Bologna atangin Joshua Zirkzee an la lut fel tawh a, an tlarhnung thawmthatna tur tunah hian player an ngaihven mek.

Rafael Varane leh Kambwala an chhuak a, Victor Lidelof leh Harry Maguire te hma hun hi a chiang lo bawk nen, United chuan defender pahnih emaw tal lak tumin hma an la niin The Athletic chuan a tarlang.

Manchester United chuan Jarrard Branthwaite lak tumin vawi hnih Everton an dawr tawh, hei hi Everton chuan an lo hnawl ve ve a, mahse United hi an la beidawng mai lo a, beihpui thlak tumin hma an la leh dawn nia report a ni.

Hetih mek lai hian United chuan Matthijs De Ligt leh Leny Yoro te an dawr bawk. De Ligt hian Old Trafford pan a hreh lo nia report a awm mek a, Yoro erawh an la thei dawn nge dawn lo a la chiang thei lo.

Kum 18 mi Leny Yoro hi Manchester United lak tum em em zinga mi a ni a, hetih lai hian Yoro hian Real Madrid a pan chak zawk nia report a ni.

Lille-a Yoro-a contract hi nakum hian a tawp dawn, a contract a hman zawh hunah free agent-in a duhna hmun a pan thei dawn.

Lille chuan a thlawna chhuahtir ai chuan, tun nipui bazar inhawn laia hralh mai an tum mek. A man an chhiar zat erawh Real Madrid lamin an pek theih a rinawm rih loh.

Hetah tak hian Manchester United chu an rawn tlazep ve a, Lille leh Man United te hi Yoro transfer chungchangah an inhmu rem chho thlup maithei bawk a ni.