Manchester United chuan an striker Rasmus Hojlund chu £30m velin hralh an phal niin BBC chuan a tarlang e.

Pre-season friendly match-a Bournemouth an hmachhawn ṭum khan Hojlund hian goal a khung a, inkhelh zawhah Old Trafford chhuahsan a tum loh thu leh, tu pawh lo lut se, inkhelhna hmun chan zel tuma a beih tur thu a sawi a nih kha.

United hian Slovenian striker Benjamin Sesko an ngaihven ve mek a, ani hi Newcastle United chuan €80m velin an dawr a, hei hi RB Leipzig chuan an lo hnar. 

Manchester United chuan an la bid ve lo a, player man to la tur chuan an player neih sa an hralh nual a ngai nia report awm mah se, Manchester United hian player hralh kher lo pawhin Sesko hi an la thei dawn nia ngaih a ni.

Manchester United hian Sesko an la thei a nih erawh chuan, Premier League PSR rules chuan a phuar ngei dawn tih a lang chiang a, hei vang hian Hojlund chu thehchhuah an tum ta niin a lang.

United hian Atalanta aṭangin £72m velin Hojlund kha an lei a, kum 5 chhung atan Old Trafford-ah contract a ziak a, tunah hian kum 2-na a hmang mek. £30m vela an hralh a nih chuan an hloh nasa dawn hle.

Hetih lai hian Sesko an lak theih phahna a nih dawn chuan United hian Hojlund hi hralh an pawiti lo nia report a ni.

United hian Sesko an la thei dawn nge dawn lo a la hriat loh, RB Leipzig striker hian a pan duh lam a la thlan fel a ngai dawn a, Newcastle aia Manchester United pan a duh zawk chuan, sum tam zawk nen Leipzig an dawr ve mai a rinawm ta a ni.