Pathianni zan Premier League match-ah Manchester United chuan Old Trafford-ah Everton an mikhual a, United hian 4-0 laiin an mikhual an sawp.
Red Devils tan Marcus Rashford leh Joshua Zirkzee te chuan goal hnih ve ve an khung a, Bruno Fernandes leh Amad Dialo te chuan assist vawi hnih ve ve an nei bawk.
Ruben Amorim chuan Zirkzee chu centre forward atan a chhawr a, a hnungah Fernandes leh Rashford te an awm a, wing-back atan Amad leh Dalot te hmangin, midfield laiah Mainoo leh Casemiro te a inkawptir. Back three atan de Ligt, Mazraoui leh Martinez te a hmang bawk.
United hian inkhelh bul an tan tha em em lo a, Everton lamin chance hlauhawm an nei tep zel. Minute 34-ah United chuan corner an hlawhchhuak a, he corner hi Bruno Fernandes chuan petin, Rashford chuan lei hrulah a hlap, goal a thlen hmain Branthwaite chuan a lo tawk kawi bawk nen, Everton goal-ah a lut chiang hle.
Minute 41-ah United chuan an goal hnihna an khung. Branthwaite-a tihsual chu Amad chuan nangchingin, Bruno chuan box chhungah ball a khalh lut a, changtu nei lo Zirkzee-a tan a pe a, ani hian tihsual nei miah loin goal hnihna a chhuih lut. Half time a nihin United chuan si hnih faiin hma an hruai.
Second half tan a ni chiah a, United chuan counter attack hmangin an nawr thut. Zirkzee chuan Amad-a tan ball tha lutuk a pe a, Amad hian chak takin Everton goal lamah a tlanpui. Defender pahnih inkara rawn dawk zawk Rashford-a tan a pe a, Rashford chuan chiang takin a chhuih goal leh.
Minute 64-ah Amad chuan Tarkowski tihsual nangchingin, box lamah ball a tlanpui leh vang vang. Free takin Zirkzee a lo tlan lut ve a, Amad chuan Zirkzee-a tan a pe a, ani hian goalkeeper phak lohna lamah a chhuih a, United goal 4-na a khung ta a ni.
He match-ah hian yellow card chawi avanga inkhelh dawt leha inlan thei lo United player pahnih an awm. Mainoo leh Martinez te chuan Yellow card an chawi avangin Arsenal an hmachhawn ve thei dawn ta lo a ni.
Amad Dialo a khel tha kher mai, chance hlauhawm tak tak a siam a, Everton tlar hnung ten an chelh lo, United chakna thahrui a ni chiang. Rashford pawhin a thiam a la theihnghilh lo, thlawptu a neih that chuan goal-ah a la hlauhawm vet vet hle. Zirkzee fak loh theih a ni lo, link-up player tha tak a ni a, forward dangte tan ball lak remchang tak takin a dah thiam.
United game a la buai deuh hlek tih chu a chiang, an tlarhnung a pawp leh thut thin. Dominic Calvert-Lewin tauh tha lutuk Onana-a'n a lo dan sak, a goal teuh kher mai. Onana chuan clean sheet a nei leh ta a, hei hi United tlarhnungte tan a pawimawh hle.
Ruben Amorim chuan Game thum United a kaihruai ta a, vawi hnih hnehna a chanpui a, vawi khat draw result a nei. Premier League home match hmasa berah 4-0 in hnehna a chanpui a, an match dawt lehah Arsenal an hmachhawn dawn a ni.