World Cup lai pawh ni se January transfer window a inhawng tep tawh, transfer news kan ngaihven reng a ngai tel bawk ang. 

Manchester United leh Benfica forward Goncalo Ramos te sawi zawm an ni mek a, January transfer window inhawn laiin United hian he Portuguese forward hi an la lut ngei dawn nia thu a than mek laiin sawi chian theih engmah erawh a la awm lo thung.

United boss Erik ten Hag chuan  Cristiano Ronaldo a chhuah hnuah January thla hian forward lak luh a duh a. Ramos, Cody Gakpo, Rafael Leao leh Joao Felix-te hi an umzui deuhte zinga langsar an ni niin English media ten an tarlang. Hetih lai hian season laklawh laia player thar lak luh hi United hian an duh vak lo thin, an mamawh em em bak an melh ngai lo tluk a ni a.

Ronaldo an thehchhuak a, forward lamah duhthlan tur Erik Ten hag chuan a nei tlem sawt dawn, heng te a nih avang hian United chuan hmatawng lam an ngaihven erawh a ngai ngei dawn.

Ramos hian nipui bazar hnuhnung ber khan Benfica hi a chhuahsan tep a, mahse cham chhunzawmin season tha tak a hmanpui mek. Season tir lamah chuan a hlut zawng hi €20 million bawr vel a ni a, mahse Qatar World Cup-a Portugal tana hat trick a siam hnu khan a hlutna hi a pung chho nghal dawr mai. Tun season-ah Benfica tana game 21 a khelhah goal 14 a khung tawh. 

United-in an ngaihven em em Gakpo hlutna pawh Qatar World Cup hnuah a let thawk deuh thawin a pung bawk. Summer transfer hnuhnung ber khan United hian  €30m bawr velin an hel a, mahse Qatar-ah Netherlands tana goal 3 lai a khung avangin PSV Eindhoven hian €50m bawr velah a man an san chho dawr niin media ten an tarlang. ESPN thudawnna lam chuan PSV hian Gakpo hi kawl rih an duh  niin an sawi bawk.

United hian Atletico Madrid player Felix pawh bawhzui deuh mah se a man €100m bawr vel hi lu tihai tham a ni a. Eng pawh nise United hian forward thar an la lut dawn a nih chuan sum an thehchhuah hnem deuh chu a ngaih dawn hmel a ni.