Matheus Cunha chungchangah Manchester United leh Wolves te chu nizan khan an inrem a, Wolves chuan Cunha hi United-a medical neih an phalsak.

Thawhlehni khan United chuan Cunha-a release clause £62.5million ($83.7m) chu pek an inhuam thu Wolves an hrilh. Wolves lam duhthusamah chuan, a hlawma sum dawn an duh laiin United chuan vawi khatah Cunha man hi an pek tlak theih loh tur thu an hrilh.

Club pahnih te nizan khan an indawr a, United chuan instalment-a Cunha man pek an duh. Wolves lam chuan vawi 3 instalment-a pek an phut. Hetih lai hian Manchester United chuan instalment vawi 5-a pek an duh a, club pahnihte an indawr fe hnuah instalment vawi 3-ah an inrem ta niin BBC chuan a tarlang.

SUM LAMA HARSATNA TAWK UNITED

Season tharah United hi European competition-ah an inlan thei dawn lo. Player leina tur sum an nei tam tawk lo. Hetih lai hian Cunha man na na na hi chu anni ang club lian tan chuan pek tlak nghal mai a harsa dawn lo.

Mahse United hian Financial Fair Play avangin tun nipui bazara player pakhat atana sum thehchhuah teuh an duh lo. Cunha mai bakah hian player dang pawh United hian lak an la tum avangin Brazilian forward man hi instalment vawi 5 rulha pek an thlang ta a ni.

June ni 1 hian transfer window a inhawng dawn a, chutah chuan official-in Matheus Cunha an la lut dawn a ni.

United hian player hralh nual an tum niin The Athletic chuan a tarlang a, loan-a an chhuahtir Marcus Rashford, Jadon Sancho, Antony leh Tyrell Malacia te chu hralh dan an dap dawn nia report a ni.

Wolves hian Gary O’Neil leh Vitor Pereira te hnuaiah 3-4-2-1 formation an hmang thin a, Cunha hi No 10 position-ah a khel thin. Hrem a tawh avangin tun season liamta khan Premier League game 6 a khel thei lo a, heti chung hian competition hrang hrangah game 34 atangin goal 17 a khung a, assist vawi 6 a nei bawk.

2024-25 Premier League season-ah khan United tana goal khung hnem ber chu Bruno Fernandes a ni a, goal 8 a khung a, an striker Rasmus Hojlund chuan goal 4 khungin, Joshua Zirkzee chuan goal 3 a khung bawk. Hetih lai hian Cunha chuan goal 15 lai a khung a ni.