Inrinni zan hian Manchester United chuan Chelsea an mikhual dawn, he match-ah hian Matheus Cunha leh Mason Mount te an inlan thei dawn niin Amorim chuan a sawi.
Pathianni zan Manchester Derby-ah khan Cunha leh Mount te hi an inlan thei lo a, Burnley an hneh ṭum khan an pahnih hian an inhliam a, tunah chuan an lo kir leh thei tawh dawn a ni.
Diogo Dalot erawh a la inkhel thei dawn lo. Ani hi Portugal squad aṭang khan a inhnukdawk a, tihrawl hliam avangin international break lai khan a inenkawl. Lisandro Martinez leh Dalot te chu an dam chho mek zel a, grass-ah training an nei chho leh thei tawh nia report a ni a, Tyrell Malacia erawh lo kir leh tawh mah se, Under 21 team lamah training a nei mek a ni.
Ningani khan United neitu zinga pakhat Sir Jim Ratcliffe chu Carrington training ground-a helicopter hmangin a thlawk lut a, hetah hian meeting pawimawh tak an nei chhunzawm. Hemi chungchang hi Ruben Amorim zawh a ni a, Amorim chuan fiamthuin, "Contract thar min zawrh leh alawm," tiin a chhang.
"Meeting chungchang chu thil thleng pangngai a ni, min support hle a, hun rei tak chhung atana hmachhawp te pawh kan sawi ho a ni. Sir Jim Ratcliffe chuan ka hnenah kumin hi United-a ka season khatna a nih thu a sawi fo bawk.
"Ani nen kan inkawm a, CEO Omar leh director of football Jason te nen pawh kan inkawm bawk. Kan team khelh dan chungchang ngun takin kan thlir ho a, inhmuhkhawm pangngai a ni e," tiin Amorim chuan Ningania meeting an neih chungchang a sawi.
United hi Premier League table-ah 14-na an ni mek a, tun season Premier League game 4 aṭangin point 4 chiah an la hlawhchhuak. Chak an mamawh em em tih Amorim chuan a hria a, chutih rualin season hmasa aia an khelh ṭhat zawk thu a sawi.
"Hei hi football a ni a, kan club-ah hian club dang zawng zawng aiin pressure a sang emaw tih tur a ni. Chak kan mamawh hle, nikum khan kan khelh danah sawisel kan hlawh nasa hle a nih kha.
"Kumin erawh kan khel ṭha ka ti hle, mahse box-ah erawh kan hriam tawk lo. Defending lam leh attacking lamah pawh kan zia a, mahse box chhungah kan nawr na tawk lo a ni.
"Goal khung kawngah kan themthiam deuh a ngai, a bakah chuan season hmasa ai khan kan khel ṭha a, team ṭha zawk kan ni bawk a, chak erawh kan mamawh a ni.
"Season tirah Arsenal leh Man City kan hmachhawn a, kan chak lo ve ve. Season hmasa erawh season tluanin kan khel chhia a ni," tiin Amorim chuan a sawi bawk.
Alejandro Garnacho chuan a vawi khat nan a club hlui a hmachhawn dawn, ani hi tun nipui bazarah khan Chelsea chuan £40million ($54m)-in an lei.
Garnacho chungchang zawh a ni a, Amorim chuan, "Garnacho chu kan player a ni tawh hleinem. Ka player te chauh ka ngaihtuah, Mason leh Cunha te an lo kir leh tawh a, ka hlim em em. Chelsea player te chungchang chu an manager-in a la rawn sawi turah ngai ang," tiin Amorim chuan a chhang.