Manchester United chuan Brighton & Hove Albion atangin central midfielder Carlos Baleba lak chhuah theih dan kawng an dap mek niin The Athletic chuan a tarlang.
Kum 21 mi hian Brighton-ah kum 3 daih contract a la nei a, ani hi tun hnai Premier League-a midfielder hot ber pakhat niin, Brighton hian chhuahtir an la phal rih dawn lo.
Hetih lai hian Ruben Amorim chuan a awt ngang mai a, Sesko manah sum tam tak an thehchhuak. Cunha leh Mbeumo te an la tawh bawk. Heti chung hian Manchester United chu an la duhtawk mai lo, central midfielder tha lak an la tum cheu a ni.
Manchester United leh Sesko te chu mimal thilah an inrem tawh a, an inlei thei a nih chuan, United hian player thar lakna tur an nei tawh dawn lo nia report a ni. Hetih lai hian an player thenkhat an hralh thei dawn tho a, chung te a nih avang chuan Baleba pawh hi an la thei dawn niin an inngai.
United hian midfielders Casemiro, Manuel Ugarte, leh Toby Collyer te an nei mek a, Bruno Fernandes leh Kobbie Mainoo te hi central midfield-ah chuan an pawh let theih dawn bawk a, mahse Amorim chuan a lai lum luah tur atan Baleba hi a awt ber a ni.
Kum 21 mi Collyer hi chu loan-in a chhuah a rinawm a, kum 33 mi Casemiro pawhin United-ah a contract a hmang zo chho mek bawk. Heng te a nih avang hian Amorim-a tan chuan Baleba hi a awhawm ngawih ngawih dawn a ni.
Kum 2023 khan Baleba hian Lille atangin Brighton a zawm a, a man kha £26million ($34.5m) bakah add-ons a tel bawk. Cameroon international hi kum hnih khat lek chhungin Premier League-a midfielder tha ber zingah a inhlangkai hman.
Season liamta khan Brighton tan competition hrang hrangah game 40 a khel a, goal 4 khungin assist vawi 2 a nei a, Cameroon tan game 7 a khel ve tawh bawk.
UNITED-IN AN DUH CHHAN CHU..
Moises Caicedo a chhuah avangin Brighton chuan a thlakna an zawng nghal vat a, kum 2023 August thla khan Lille atangin Baleba hi an la lut.
Player che rang tak a ni a, defender hmaah awmin, goal venhim lamah pawh tha a thawh hlawk hle. Field laiah a tal na em em a, ball a thiamin a ball chan a him bawk a, a tackle a tha em em bawk a, khingpui te tan hmachhawn a hautak thin.
Khingpuite ball chang lai awlsam tak takin a chhuhsak thei a, a passing pawh a dik a, Brighton game innghahna a ni kan ti lo thei lo. Brighton-in ball an hloh apiangin Baleba hian rang takin a chechhuak a, mual lai chu a venghim tha thin hle.
Ani a khelh hi chuan Brighton hi posession-ah an zia em em a, ball chan hnem a duh a, a kiang hnaia mi awlsam tak takin ball a pass thin. Hetih lai hian ball hlauhawm erawh a vawrh lutuk lo. Attacking lam ai mahin, defending lamah a tangkai a ni.
Manchester United midfield hi a thawl thei hle a, Casemiro lah a lo upa ve tawh bawk a, a che muang deuh hlek thin bawk nen, rilrawla han hman atan chuan a chhawr tlak tawh loh maithei a ni.
Heng te a nih avang hian Ruben Amorim chuan defending pui thei leh ball an chan tam theihna tur leh khingpuite ball chhuhsak zung zung theihna tur player a mamawh a, Carlos Baleba hi a zuan ta chat a ni.