Ningani khan Manchester United neitu zinga mi Sir Jim Ratcliffe chu Carrington training ground-ah helicopter hmangin a thlawk lut a, hetah hian thu pawimawh tak tak an rel a, chung zingah chuan head coach Ruben Amorim-a chungchang pawh an rel tel niin The Athletic chuan a tarlang.
An thurel chungchang erawh media te hriat an phal lo a, media lamin an hriat theih zingah chuan Amorim-a hma hun chungchang an sawi nia report a ni a, team-in hma a sawn theihna tur atana an ngaipawimawh te an sawi ho bawk nia report a ni.
Tun season chu United-in bul an ṭan chhe leh pek hle. Premier League game hmasa 4-ah vawi 1 chiah hnehna an chang a, vawi 2 an tlawm a, vawi 1 an khingpui an inhnehtawkpui. Pathianni liamta khan Manchester Derby-ah 3-0 ngawtin an mualpho a, Carabao Cup aṭangin League Two team Grimsby Town chuan August thla khan an hnawtchhuak bawk.
Tun nipui bazar inhawn lai khan Ruben Amorim chuan United hmatawng thawmṭhat nan Bryan Mbeumo, Benjamin Sesko leh Matheus Cunha te a lei a, hmatawng thawmṭhat nan £200million vel sum an seng nia report a ni. Hetih lai hian an khelh dan phungah Amorim chuan sawisel a hlawh chhunzawm zel a, a formation hman chu United player ten an hmang thiam hlawl lo nia sawi a ni.
Tun inrinni zan hian Old Trafford-ah Chelsea an mikhual dawn. United hi table-ah 14-na an ni mek a, season liamta khan table-ah 15-na niin season an khar a, Europa League final-ah an chak lo a, tun season-ah European game an khel dawn lo. Tun inrinnia Chelsea an hneh lo a nih chuan, Amorim-a dinhmun hi a derthawng hle dawn nia ngaih a ni.
Nikum November thla khan Erik ten Hag an ban hnuah Manchester United chuan Ruben Amorim an chhawr ṭan a, mual chhungah result ṭha hlawhchhuak thei lo mah se, Ratcliffe chuan Amorim-a chungah rinna a la nghat tlat.
Kumin March thla khan Ratcliffe chuan, "Thu dik tak chu, Ruben hi ka mi ngainat em em a ni. Thil nihna tak min hrilh ṭhin. Training ground-a ka kal chang te hian kan inkawm reng zel. Kan ṭhu dun a, coffee kan in dun a, thil dik lo awm te leh engkim hi min hrilh vek zel, ka mi ngainat a ni," tiin The Times hnenah a lo sawi tawh a nih kha.
Europa League final-a an chak loh khan Amorim chuan, "United manager tur dik tak ka ni lo a nih chuan, compensation pawh la loin ka chhuak mai ang e," tiin a lo sawi tawh a, Grimsby laka an tlawm pawh khan, "Player 22 te vawi khatah a chhuahtir vek theih loh, manager ban hian awmzia a nei zawk maithei a ni," tiin a lo sawi hial tawh bawk a nih kha.
Pathianni zana Manchester City an hneh loh khan, Manchester United hotu ṭhenkhat te chuan Amorim hi ban an duh tawh niin media te chuan an tarlang a, a game tactic leh a formation hman dan chu United player te hmasawn theih lohna niin an ngai.
Man City an hneh loh khan Amorim chuan, "Min sawiselna chu ka hrethiam khawp mai, ka pawm thlap e. Manchester United tawn atan chuan thil duhawm lo tak a ni. Chutih laiin kan team chhungah hian eng nge thleng tih an hre si lo.
"Ka khelhpui dan hi thlak danglam ka tum lo. Ka ngaihdan thlak ka duh hunah chuan ka thlak mai ang. Tuna thil thlak danglam an duh a nih chuan, kei hi thlak tur chu ka ni mai.
"Kan chak loh hian kan khelh dan nasa takin kan sawi ho leh ṭhin a, kan khelh dan system hi niin ka hre lo kan chak loh chhan hi. Ka khelhpui dan hi ka la ring tawk em em a ni," tiin a sawi.