Manchester Derby hi mipui nghahhlelh a ni thin a, El Clasico ang chu phak lo mah se, English football-ah chuan Derby thawm nei lian ber zinga mi a ni kan ti thei awm e.
Hetih lai hian Pep Guardiola chuan Manchester United chu an elpui ber an nih loh thu a sawi chhuak a, tun hnaiah United hian City hi an el phak lo hle.
Manchester City boss chuan English club zingah chuan Liverpool chu a dahsan thu a sawi a, anni avanga team tha zawka an inhlankai thu a sawi tel bawk.
"Ole-a'n United a enkawl lai khan kum khat emaw vel chu kan intiat tawk dawn viau hman. Mahse City ka enkawl chhunga ka khingpui lian ber ni reng chu Liverpool hi an ni. Hemi hmuna ka hun a zawh hnuah pawh Liverpool hi ka elpui ber an nih thu ka sawi thin bawk ang.
"Liverpool hi el tham an ni a, anni kan el avangin team tha zawk kan nih theih phah a ni. He hmuna ka awm chhung hian anni aia elpui lian ka nei lo.
"Arsenal te pawh an rawn tho kang chho leh alawm. Newcastle United pawhin team thar an din mek a. Chelsea pawh tunah hian team thar din tumin hma an la mek.
"Spurs te pawh kan sawi hmaih thei lo ang, an khel a hmuhnawm em em a, manager an nei tha bawk nen, team khawng tak an rawn ni chho mek. Mahse City ka enkawl tirh atanga vawiin thlengin Liverpool hi ka elpui ber an ni," tiin Pep Guardiola chuan a sawi.
Sir Alex Ferguson khan United a enkawl lai khan Manchester City kha an elpui an nih ngai loh thu a sawi a nih kha. Spanish manager hian Sir Alex-a thusawi kha a pawm thlap bawk.
"Sir Alex khan a sawi dik alawm, khatih lai kha chuan City kha el tham an ni lo. Tunah erawh Sheikh Mansour leh Khaldoon te hoin team tha tak kan nei a, sum tam tak anni an rawn thawh bawk a.
"Tun hmaa United leh Arsenal te an hausak ang maiin keini pawh kan dinhmun a tha tawh e. Sir Alex Ferguson khan tuna kan dinhmun hi khatih lai khan a ngaihtuah phak bik lo ang.
"Kei pawh Barcelona-a ka awm lai a ni a, hetiang hian City hi an la lian ang tih ka ngaihtuah phak bik lo. Tuna kan dinhmun ang hi nih chhoh zel pawh kan tum dawn a ni," tiin Guardiola chuan a sawi bawk.