Ningani zan khan Manchester United chuan Lille atangin defender Leny Yoro chu an la lut fel ta a, kum 5 chhung atan contract an ziahpui a, hetah hian kum khat dang atana pawh sei theihna ziah tel a ni bawk.
Kum 18 mi French centre-back manah hian United chuan €62million (£52m; $67.9m) lai an thehchhuak a, hetah hian add-ons €8m a la tel bawk.
"Tum sang tak nei leh inrelbawlna nei tha tak, Manchester United-in ka career tir lama min la lut hi ka tan chuan chawimawina a ni ringawt.
"Kan inbiak tirh khan, an tum leh an hmachhawp te min hrilh nghal vek a, Manchester United hian hmachhawp phurawm tak an nei a, kei leh ka chhungte pawh min ngaihtuah nghal em em bawk.
"Manchester United-in player naupang an enkawl dan ka hre ve a, he hmun hi ka thanlen zelna tur leh ka thatna ber haichhuah a nih theihna tur atana hmun tha ber a ni a, ka team-mate thar te nena bul tan thuai thuai ka nghakhlel a ni," tiin Yoro chuan a sawi.
Tun kar thawhlehni zan khan a man tur chungchangah club pahnih te an inrem a, a man hi €70million thleng pawhin a pung thei dawn. Nilaini khan UK-ah thlawk lutin, medical a nei chhunzawm a, Ningani zan khan Manchester United chuan an la lut fel ta a ni.
United sporting director Dan Ashworth chuan, "Leny hi tunlai khawvela defender naipang hmuhnawm ber pakhat a ni. Top class centre-back ni thei tura theihna leh thiamna nei a ni bawk.
"Player naupang te ni chungin a career tir lam a hmang tha em em a, theihtawp chhuahin Manchester United-ah hian a that dan ber haichhuah kan tum dawn a ni.
"He club hian player naupang thanlenna kawngah record tha tak tak a nei a, Academy chhuak emaw, hmun dang atanga an lak luh emaw pawh, dawhtheihna nen an par vul hun nghakin an enkawl thin.
"Erik ten Hag leh coaching staff tha tak tak hnuaiah a that dan ber haichhuah a ni ngei ang," tiin a sawi ve bawk.
Yoro hi Lille academy chhuak a ni a, May 2022 khan kum 16 mi niin, senior-ah a inlan tan. Player naupang tak ni mah se, Ligue 1 defender tha zingah a inhlangkai hman a, Ligue 1-ah game 60 a khel hman a ni.
Kum 2025 June thla hian Lille-a Yoro contract a tawp dawn. Free transfer-a chhuahtir ai chuan, French club hian man to takin an hralh ta zawk a ni.
United hian an tlarhnung thawm that nan player dang an la melh chhunzawm zel a, Bayern Munich defender Matthijs de Ligt leh Everton defender Jarrad Branthwaite te chu tun nipui bazar inhawn laia lak luh tumin hma an la zel tho niin The Athletic chuan a tarlang.