FA Cup final-ah khan mipa pakhat chuan Hillsborough disaster lam kawk thei kawr a rawn ha, man nghal a ni.

Kum 33 mi James White chuan, Manchester City leh Manchester United ten Wembley-a FA Cup final an khelh khan, Liverpool chhiattawhna nuih zawngin a kawr a rawn ziak rang.

A kawr hak lai thalak hi Metropolitan Police Events Twitter account-ah tweet chhawn a ni a, Manchester United jersey hain, number 97 a inziak a, 'Not Enough' tih a inziak.

Hillsborough chhiatna lam kawk thei inziahna kawr a hak avangin White hi man a ni a, June ni 19-a
Willesden Magistrates’ Court-a inlan turin chhuah lailawk a ni.

Chhan hrang hrang avangin mi 22 man an ni tel bawk niin police lam chuan an tarlang a, khelmual chhungah pawh thil paih luh niin, hei erawh a mawhphurtu man a la ni chiah lo.

"Hillsborough chhiatna kaihhnawih  thawmhnaw hak kha FA chuan kan duh lo a, thlalak kan hmuh hnuah rang takin hma kan la nghal. 

"Kan security team-te pawhin a hatu an man nghal a, a bak chu police-te kutah hlan a ni. Football-a chhiatna thleng reng reng Stadium chhunga pholan hi kan duh lo a, kan tuar dai mai mai dawn lo. Mawhphurtu pawh a phu tawk hremna pek a ni ang,"tiin FA thuchhuah chuan a tarlang.