A chiang thawkhat niin a lang. Manchester City an hmachhawn dawn khan Ruben Amorim chuan Garnacho leh Rashford te squad atangin a thehchhuak.

Amorim chuan anni pahnih a thlan loh chhan chiang fek fawkin a sawi, training-naa an chet dan leh team tana an tangkai dana zira team selection siam a nih thu te, player tu pawh chawlhtir ngam loh a neih loh thu te thlengin a sawi a nih kha.

Manchester Derby boruak karah khan Rashford-a chungchang chu media luah nasa ber pakhat a ni chhunzawm. Football pundit te chuan Rashford chhuak tur angin an sawi hlawm a, media tam tak pawhin Rashford a chhuak dawn niin an sawi bawk.

Titi lengvak a than kual mek laiin Marcus Rashford a tawngchhuak ve ta. "Chona thar hmachhawn tur leh bung thar kai turin ka inpeih ta niin ka hria.

"Boruak tichhe zawnga khawsak ka duh lo. Ka insawn anih chuan thuchhuah ka siam ang a, (ka thuchhuah chu) keimah aṭanga chhuak ngei a ni ang," tiin Rashford chuan a sawi.

Rashford a tawngchhuah takah chuan thil a chiang ta kuar niin a ngaih theih. Tun January transfer window inhawn hunah hian United chuan Rashford hi hralh an tum dawn niin media te chuan an tarlang mek a, Barcelona nen pawh sawi zawm a ni mek bawk.

Tun season chhungin Rashford hian competition hrang hrangah game 24 a khel tawh a, goal 7 khung tawhin, assist vawi 3 a nei tawh.  Kar khat chhungin Old Trafford-ah £300,000 lai a hlawh a, kum 3 chhung contract a la nei bawk.

Beisei a phak loh em avang leh, team a puih that tawk loh avangin United fans tam tak pawhin chhuak se an duh a, Ruben Amorim hian thutlukna huaisen tak a rawn siam chho niin a ngaih theih.