Manchester United chuan tun nipui bazarah hian Alejandro Garnacho an chhuahtir dawn niin Fabrizio Romano chuan a tarlang.

Europa League final an khelh zawh khan Garnacho chu social media lamah a ang chhuak a, kha vang khan Ruben Amorim chuan Old Trafford chhuahsan turin a ti a nih kha.

Khata tang khan Garnacho hi a chhuah a rinawm sa hrim hrim. Chutih laiin tuna Garnacho thehchhuah chungchanga thutlukna siamtu chu head coach ni loin, United hotute niin Fabrizio chuan a tarlang a ni.

United chuan Matheus Cunha an la lut a, Garnacho an mamawhna a tlahniam ta bawk nen. Tin, player lak luh an duh zel bawk avangin player hralh tur an ngaihtuah a ngai ve bawk.

Garnacho hi an hralh thei a nih chuan player dang lak luh theih nan kawng a inhawng zau dawn tihna a ni a, United fans chuan ui hle dawn mah se, team siam that nana United tihmakmawh a ni ve reng kan ti thei awm e.

Garnacho hi Bayer Leverkusen chuan an ngaihven nia report a ni a, hetih lai hian German club hian a man a pek theih a rinawm chiah loh. Italian club leh Premier League club te pawhin Garnacho hi an ngaihven nia report a ni a, season tharah chuan Garnacho hian club thar a neih ngei a rinawm ta hle.