Pathianni zan Premier League match-ah Manchester United chu Villa Park-ah an leng lut a, team hnih te goal awm loin an inhnehtawk.
Inkhel hmuhnawm tak a ni lem lo a, goal hlauhawm pawh an tam lo hle. Rashford chuan chance tha tak vawi hnih vel a nei a, Bruno Fernandes pawhin free kick atangin Villa goal kham a pet per bawk.
Competition hrang hranga an game hnuhnung 5-ah United hian chak ni hmel an hmu lo a, vawi 4 an khingpui inhnehtawkpuiin, Spurs lakah si thum faiin an tlawm.
Erik ten Hag leh a hote hi Premier League-ah 14-na an ni mek a, relegation zone an hnaih hle. Season hmasa kha Premier League bul an tan chhiat ber a ni a, an game hmasa 7-ah point 9 chiah an hlawhchhuak.
Kha record chhe tak kha tun season-ah an khum leh ta chaih mai. Khelh 7 atangin United hian point 8 chiah an hlawhchhuak a, vawi 2 an chak a, vawi 2 an khingpui an inhnehtawkpui a, vawi 3 an tlawm. goal 5 chiah an la khung a, Premier League-ah anni aia goal khung tlem chu 19-naa awm Southampton chiah an ni.
Villa nen goal awm lova an inhnehtawk hnuin Erik ten Hag chuan, "Team inkaihhruaina tha takin kan zawm a, player te pawhin an theihtawp an chhuah. Team rilru puthmang a dik a ni.
"Goal chhuah hlauhawmah kan ding lo a, kan defending a tha hle. Chance tha vawi khat emaw an rawn nei ve chauh a ni.
"Chance vawi khat emaw vel chauh an neih laiin, keini chuan inkhel kan thunun a, chance pawh kan siam nual bawk.
"Kan inkhing tawk em em a, bar kan pet per a, Rashy pawhin chance tha tak a nei bawk. Mahse team hnihte kha kan inkhing tawk em em a ni.
"Goal kan khung tam lo, hei vang hian bul kan tan tha tawk lo. Goal khung lamah hma kan sawn a nai a ni.
"Hnehna kan chang dawn a nih chuan, goal kan khung a ngai, hmasawnna tur kan nei zel.
"Chutih laiin clean sheets vawi 4 kan nei tawh a, kan defending a tha tih a chiang. Villa khan counter-attack hmanga min nawr an tum a, kan inveng tha em em a ni," tiin a sawi.
Manchester United supporter tam tak chuan Erik ten Hag an hne tawh a, ban mai an duh tawh. Season hnih chhung a enkawl tawh a, trophy pahnih chu a chawipui. Mahse an game-ah erawh hmasawnna a awm tak tak thei si lo.
Ralf Rangnick-a'n United siamthar leh nan chuan player thar tam tak an mamawh thu a lo sawi tawh a nih kha.
Erik ten Hag chuan player thar lei nan £540m chuang a seng tawh. Position tinah player thar a nei tawh ti ila kan sawi sual lo ang. A duhthusam player la lut tawh mah se, game-ah hmasawnna a lang tak tak thei chuang lo.
Maresca te chuan Chelsea team buai tak kha thla thum emaw chhung vel lekin a chingfel chho mek, game khelhphung tha tak an rawn nei nghal mai.
Arne Slot pawhin 4-3-3 formation a rawn hmang ve nghal chat a, high pressing game tha tak rawn khelhpuiin, tunah chuan Premier League hmahruaitu an ni mek.
Erik ten Hag hian United hi eng game nge a khelhpui? Tih hi fans lam zawhna a ni. Counter attack chiah hi a thiam em ni? Team lian an hmachhawn tumin counter attack hmang mah se, a demawm lem loh. Mahse team lian lo a hmachhawn pawhin counter attack a hmang zel bawk nen.
Hmatawng lamah Hojlund leh Zirkzee te nei tawh mah se, goal erawh an khung thei chuang lo a, chance hlauhawm pawh an nei tam thei bawk lo. Tunah hian Old Trafford-ah kum hnih chhung contract a la nei mek. United hian an ban a nih chuan £17m emaw vel compensation-ah an thehchhuah a ngai dawn.
Tun nipui khan United hotute chuan coach thar an dap ngei alawm, mahse coach tha remchang an hmuh mai loh avangin an inruai chhunzawm leh ta kha a ni a. Player inhliam a chhuanlam fo a, club dang pawhin player inhliam an nei ve reng tho, football pundit tam tak chuan chhuanlam tlingah an ngai lem lo.
Villa Park-ah khan Ratcliffe leh United hotu thenkhat khan inkhel an en ve. A hma hun tur chungchang media lamin an buaipui luih luih laiin Ten Hag erawh a thla a muang thung.
"Kan hotute nen kar tin kan inbe reng. Board member, player leh staff te kan inlungrual em em. Kan thil tum leh kan pan mek kawng hi kan hrechiang hlawm bawk.
"Kan project hi long-term project a ni a, hmasawn turin kan bei chho zel a, team indinthar mek kan ni bawk.
"Away game hautak em em pahnih kan hmachhawn a, team inlungrual kan nih zia kan tilang. Player te pawhin kan hmachhawpah hian rinna an nghat tlat bawk a ni," tiin Erik ten Hag chuan a sawi bawk.