Club thar zawng turin an ti a, chawlh pe mah se Marcus Rashford chu thawhtanni khan Carrington-ah a kir leh a, hetah hian thawhlehni pawh khan training a nei nia report a ni.

Rashford hian United team training a zawm lo a, amahin training a nei niin The Athletic chuan a tarlang.

Kar hmasa Zirtawpni khan Rashford, Alejandro Garnacho, Jadon Sancho, Antony leh Tyrell Malacia te chu United chuan club thar zawng turin an ti a, chuvang chuan chawlh an pe nia tarlan a ni.

Hetih lai hian Carrington-a training-na hmun leh damdawi lama inenkawlna erawh an hmang thei vek tho nia report a ni bawk.

Heng player 5-te hian Old Trafford chhuahsan an duh niin thu thang mah se, player thenkhat hi chuan United chhuahsan an duh lo niin vawiin lam media te chuan an tarlang leh mek bawk.

Rashford-a jersey number chu Matheus Cunha hnenah pek a ni a, United hian Cunha hi Wolves atangin  £62.5million velin an lei a, jersey no. 10 an pe a ni.

Season hmasa chawhnu lam khan Rashford hian Villa lamah loan-in hun a hmang a, kum 27 mi hian Barcelona zawm a duh hle nia report a ni.

Barcelona chuan Nico Williams lak tumin hma la mah se, Williams hian hun rei tak atan Athletic Club-ah contract thar a ziak leh si.

Tin, Barcelona hian Liverpool atangin Luis Diaz ngaihven viau mah se, Reds chuan an chhuahtir phal a rinawm loh.

Heng te a nih avang hian Marcus Rashford chu Barcelona hian lak an tum dawn nia report a ni a, Rashford pawh hian Barcelona a zawm theihna tur a nih dawn chuan a hlawh tihhniam a remti nia report a ni bawk.

United hian player thar lak nan sum an mamawh a, chuvang chuan an player chhuak tura an tihte hi hralh vat vat an duh. 

Bryan Mbeumo chu lak tumin theihtawp an chhuah mek a, hetih lai hian an tum angin indawrna a kaltluang hleithei lo a ni.

July ni 19 hian United chuan Pre-season game hmasa berah Leeds United an hmachhawn ang a, hemi hnu hian United States lamah an zin ang a, Premier League Summer Series an khel ang.