United-ah Mancini?

27th January 2022, 04:01PM

Manager thar zawng mek Manchester United chuan Italy head coach Roberto Mancini an duh niin English media-te chuan an tarlang.

United hian an interim manager Ralf Rangnick chu a ngheta chhawr an duh niin an lo tarlang ve mek bawk a. 

Fabrizio Romano chuan United leh Mancini te hi a sawi zawm mek, Mancini hian Manchester City a enkawl laiin a vawi khat nan kum 2012 khan Premier League title a lakpui a nih kha.

Manchester United defender hlui Rio Ferdinand a phur hle,  "Roberto Mancini-a chungchang hi ngaihven ang aw. World Cup-a qualify turin a theihna zawng zawng a seng mek ang, chutih laiin United boss ni thei a ni ve reng mai.

"Premier League club lamin an ngaichang tih a chiang a, amah pawhin Premier League-a kir leh a chak dawn chiang a ni," tiin United tana game 450 chuang khel Rio Ferdinand chuan a sawi.

Mancini hian Euro 2020 Final-ah England hnehin no mawi a chawi a nih kha, hetih lai hian World Cup qualifying-ah erawh playoff an khelh a ngai thung. 

March thlaah match pawimawh tak an khel dawn, North Macedonia an hmachhawn ang a, chuta an chak a nih chuan Portugal emaw Turkey emaw an hmachhawn ang.

Mancini hian Italy chu World Cup a qualify pui loh chuan club management lamah a kir leh a rinawm, Italy an qualify a nih erawh chuan kumin kum tawp lamah World Cup khelh a ni dawn a, a hma hun a hriat tawh loh a ni.

Mancini hian Premier League club Manchester City kha kum 4 chhung a enkawl a, City tan league game 191 atangin vawi 113 a chakpui bakah league title hlu tak a lakpui. 2010-11 FA Cup a chawi bawk a ni. Tin, Inter a enkawl laiin ropui takin a khelhpui a, kum 2005 atanga 2008 inkar khan Serie A title vawi 3 a lakpui a ni.

Copyright © inkhel.com 2022. All rights reserved.