Al Hilal lamin hlawh tam tak zawrhin Bruno Fernandes chu an dawr. Kar hmasa zirtawpni khan Bruno-a agent te chu Saudi Arabia lamah an thlawk lut nghe nghe.

Saudi Pro League club Al Hilal hian kum 30 mi Bruno Fernandes hi kum khat chhunga €25million hlawh turin, kum 4 chhung contract ziahpui an tum. Hei hi United-a a hlawh let 3 laia tam a ni.

Tin, Old Trafford atanga Bruno Fernandes lak chhuah nan Al Hilal hian £80m lai thehchhuah an inhuam bawk. Hetih lai hian United captain hian Manchester United tana khelh chhunzawm zel a thlang a, level sang bera khelh chhunzawm zel a duh thu a sawi chhuak a ni.

"Chhuak thei dinhmunah ka ding, Al Hilal president-in thla hmasa khan min rawn bia. Ka hma hun atan rorel ka mamawh a, ka inngaihtuah ve. 

"Manchester United hi ka tan chhuahsan hun a ni em? Tih te ka ngaihtuah a, inbiakna kan nei. Ruben Amorim nen kan inbia a, club hotute pawh ka dawr bawk. Chhuahtir min phal lo a, sum chungchang ka ngaihtuah ve lo, United hian chhuak tura min duh hunah ka chhuak mai dawn a ni.

"Ka chhungte pawh ka bia a, ka nupui nen pawh kan sawi dun. Ka nupui chuan hming tha taka ka khelh chhoh zel theihna tur a ngaihtuah ber.

"Saudi lam pan hi ka tan a harsa dawn miah lo, a chhan chu Ruben Neves leh Joao Cancelo te an awm a, anni pahnih hi ka thian tha tak an ni.

"Chutih laiin football level sanna bera khelh chhunzawm zel ka duh a, competition hautak ber hmachhawn zel ka duh, a chhan chu hetiang ti thei dinhmunah hian ka la ding niin ka inhria. Ka thutlukna siamah ka hlim a, hmasawn zel ka la duh a ni," tiin Bruno Fernandes chuan a sawi.