Pathianni zan khan Old Trafford-ah Liverpool chuan si thum faiin mual neitu Manchester United an sawp a, Reds tan Luis Diaz chuan goal hnih khungin, Mohamed Salah chuan goal khat a khung bawk.

Tactical Review nei dawn ta ila, Liverpool lam hi sawi tam vak ngaiin a lang lo. Arne Slot chuan Premier League game thum Liverpool a enkawl atangin vawi thum hnehna a chanpui nghal a, goal an chhuah lo bawk.

SLOT NGE KLOPP?

Arne Slott hi fak tur a ni nge? Klopp kha kan la fak zawk dawn? Hei erawh sawi thiam a har hle. Klopp khan team chemistry tha tak chungin a kalsan a, Slot hian Klopp-a hna a chhunzawm a ni ber a, Slot hi fak tur chu a ni tho, chutih laiin Barcelona vanglaia coach chi hrang hrangin an enkawl kual chung pawha team tha tak an ni thei ang deuh kha an ni ve mek.

Liverpool counter pressing game kha a hmuhnawm a, player te viak a tha a, an hmatawng te kha an tlan tam em em. An khingpui te kha pressure an pe char char, an thawhrim rah an tel a, game an thunun theih phah ta a ni. 

UNITED-IN LIVERPOOL AN KHAN LO LUTUK
 
Liverpool lam chungchang chu sawi thui vak tur a awm lem lo, coach-in khelh dan tur a ruahman angin an khel a, khual mualah pawh nise ropui takin an hmelma an hmachhawn a, team chungnung zawk an ni.

UNITED BUAINA ENG NGE?

Casemir leh Mainoo te tihsualah goal thum an chhuah. An midfielder te chetsual vang chu a ni teh meuh mai, chutih laiin anni player pahnih chauh hi dem tur an ni bik lo niin a lang.

Old Trafford-a team pahnihte danglamna chu, Liverpool khan ball an hloh changin an forward te nen lam an vai mai khan ball chhuh let tumin an tlan let, United player te khan hmun thawl an nei hleithei lo.

United player te erawh, an hmatawng pathumte kha lehlam half-ah an awm deuh chawt a, ball an hloh pawhin umlet an tum vak lem lo. Garnacho kha a tlan let ve thin a, mahse tha a thawh hlawk em em lo. Rashford phei kha chu veilam sirah khan an tawm deuh kuk reng mai a, an side defender te khan puitu an nei tha lo a ni.

Goal an chhuah danah erawh, forward te puih hman a ni chiah lo. Casemiro pass sual vangin Liverpool-in an chhu let nghal, winger te leh forward te tan tlan letna hman a awm lo.

Goal hnihnaah leh goal thumna pawh kha midfielder-in ball a hloh vang a ni a, rang takin Liverpool hmatawng te khan an chhu zui a nih kha.

United back 4 te kha an la inman tawk lo niin a lang a, de Ligt leh Martinez te Ten Hag-a'n Liverpool hmachhawn tura a rawn chhawp chhuak ringawt te kha a mak khawp mai. Brighton an hmachhawn tumin bench atangin de Ligt a lut, partnership duhthu a sam lo tih a lang reng a, team tha Liverpool hmachhawn turin inkhelh bul a tantir nghal kha chu a mak hle a ni.

Liverpool midfield tihsualah United pawh khan counter attack an nei ve thin. Mahse pass tur chungchangah thutlukna an siam sual fo a, counter attack atangin chance hlauhawm an siam theih loh phah.

United winger te leh an hmatawng te khan an tlarhnung an puih that tawk loh avangin Liverpool khan hmun thawl an ngah phah a, inkhel an thunun theih phah a ni.

Arne Slot khan midfield laiah player pathum a hnawh. Chutih laiin Ten Hag chuan Mainoo leh Casemiro te chauh a dah bawk si. Midfield-ah an hneh lo em em a, pass tur remchangin an tlarhma te an rawn let tam bawk si lo a, an chetsual phah ta ti ila kan sawi sual lo ang.

CASEMIRO HI 

A tihsual pahnih atangin United-in goal an chhuah ve ve. Kum 32 mi a ni ve tawh a, Real Madrid-a a khelh lai ang kha Casemiro hian a phak tawh lo niin a lang. 

Football pundit Paul Scholes chuan, "Kum 32 mi a ni tawh a, UCL vawi 5 lai a chawi tawh bawk. Real Madrid-ah chuan midfield a thunun hneh hle. Mahse a chhan chu a khelhpuitea zir a ni ve bawk. Keini pawh kha kan kiangah Park ji Sung kha a awm a, amah avang khan kan khel tha em em. Kum 32 hnu lamah erawh khelh that loh chang kan ngah ve ta mai. Casemiro pawh hi khelh thatna match a la nei dawn tho a, mahse a hma ang kha a ni tawh lo a ni," tiin a sawi.

UGARTE AN MAMAWH

Player viak tha leh khingpui te ball chhuhsak thei Ugarte an la lut, United midfield chu nasa takin a pui ngei ang. Hetih lai hian an winger leh hmatawng ten an puih that loh chuan, Ugarte pawh hi ropui taka a rawn chet erawh a rinawm bik loh. 

TEN HAG HIAN ENG GAME NGE A KHELHPUI?

Hei hi a ni zawhna ni ta chu. Season 2 chhung United a enkawl ta a, eng game nge a khelhpui? An khelh dan hi eng game nge? Tih hi sawi fak a la har reng.

Arne Slot chuan Liverpool hi high pressing game a rawn khelhpui ve nghal chat a, an identity a hriat nghal. Chutih laiin Ten Hag-a game hi hriatthiam a la har.

Counter attack bak hi tactic a nei lo em ni? Hei hi United supporter te zawhna a ni ta a ni. Beiseina la nei chungin United hotute chuan Ten Hag an chhawr chhunzawm, mahse season hmasa nen khan thil danglam vak a awm rih lo tiin duhtawk phawt mai ang u aw.