Manchester City manager Pep Guardiola chuan UK-ah chuan mi zawng zawngin anni aia Liverpool an tan zawk thu a sawi.

City hi khelh thum la awmah Premier League hmahruaitu an ni mek a, anmahni umtu ber Liverpool aiin point 3-in an sang zawk a, champion tura rinkai ber an ni mek.

Premier League champion lai City hian an title humhim an tumna kawngah kawng dik an zawh chho zel a, weekend liamta khan Liverpool an tawlhthluk laiin, City erawh hian 5-0 ngawtin Newcastle an sawp.

Newcastle nena an inkhelh zawhah Guardiola chuan, “Kar khat liamta kha chuan tu mahin kan champion an ring lova, he ramah hi chuan mi zawng zawngin Liverpool an tan a, media leh tu pawh mai hian an tan zawk.

“Liverpool hian Europe-a history ropui tak an nei a, mahse Premier League-ah erawh an nei lova, kum 30 chhungin vawi khat an champion. Tunah chuan point 9 kan hlawhchhuah a ngai a, point 6 pawh a tawk maithei.

“Kan game khelh leh tur pahnih hian engkim a hril dawn a, Nilainia kan khelh tur hi kan tan chuan final tak tak a ni a, kan champion leh champion loh chu kan kutah a innghat a, a pawimawh hle a ni,” tiin a sawi.