Manchester United chuan an player pawimawh leh an innghahna Antony chu loan-a chhuahtir an tum a, Real Betis pan turin United chuan Antony hi Seville-a zin an phalsak.

Real Betis leh United te chu Antony loan chungchangah hian an inbe rem tawh niin The Athletic chuan a tarlang. Tun season chawhnu chhung atan Betis chuan Antony hi an hawh ang a, inlei theihna erawh inremnaah a tel lo thung.

Loan fee a awm lo a, Brazil international hian United-ah kar khat chhungin £105,000 a hlawh a, Betis lam hian Antony hlawh 84% an lo tum ve dawn a ni.

Hetia Antony loan-a an chhuahtir dawn avang hian United chuan season chawhnu chhungin £1.5million vel player thar leina tur an neih belh dawn tihna a ni.

Kum 2022 September thla khan Antony hian Ajax atangin €100m (£84m, $102m) laiin Old Trafford a pan. Ajax-a a thiam a theihnghilh deuh niin a lang a, han vir kual deuh pup pup mah se, United-ah a che ropui hleithei lo.

A season khatnaah Premier League game 23-ah inkhelh bul a tan a, season hmasa khan vawi 15 chiah inkhelh bul a tan. Tun season-ah phei chuan inkhelh bul a la tan lo.

Manchester United-a a khelh chhung hian vawi 96 chu a inlan ve tawh a, goal 12 a khung ve tawh bawk. League-a a goal hnuhnung ber chu April 2023 daih tawh khan a ni.

Real Betis boss hi Man City boss hlui Manuel Pellegrini kha niin, La Liga table-ah 12-na an ni mek a, ani hian wing atanga khingpuite beih tumin player a dap kual a ni.