Manuel Ugarte chuan vawiin August ni 27 hian Manchester a pan ta a, medical a nei dawn niin The Athletic chuan a tarlang.

A man chungchangah hian PSG leh Manchester United te chu €50million (£42.3m; $55.8m) bakah add-ons €10m in an inrem a ni.

Paris Saint-Germain lam hian add-ons telh an duh lo na chungin, add-ons €10m in an inrem ta tho a ni.

United hian Ugarte an lak luh theih dawnna chhan chu, Napoli lamah Scott McTominay an hralh dawn vang a ni a, nimin lam khan Napoli leh United te chu McTominay manah €30m (£25.4m; $33.6m)-in an lo inrem tawh a ni.

Tun transfer bazar inhawn tirh atang khan United chuan Ugarte hi an lo ngaihven tawh a, mahse PSG lamin a man an chhiar zat €60million (£51.4m) chu to an ti mah mah a, an indawr chho zel a, transfer window khar a nih dawn hnaih lamah inremna an nei thei ta a ni.

Season liamta khan Ugarte hian PSG tan competition hrang hrangah game 37 a khel a, Ligue 1 title, Coupe de France leh Trophee des Champions te a la a ni.

League lamah vawi 21 chiah start mah se, Champions League group stage lamah erawh a start ziah tluk a ni. Hetih lai hian knock out stage lamah erawh starting XI a chang ta lo a ni.

Ugarte hian Uruguayan club Fenix atangin bul a tan a, kum 2020 December thla khan Portuguese club Famalicao a zawm, chumi hnuah kum 2021 nipui lai khan Sporting a zawm leh a ni.

Ugarte-a transfer chungchang hi a hlawhtling a nih chuan, tun nipui bazar inhawn laiin United chuan player 5 an lak luhna a ni dawn a, Erik ten Hag chuan Joshua Zirkzee, Leny Yoro, Matthijs de Ligt leh Noussair Mazraoui te a lo la lut tawh a ni.