UFC light heavyweight champion thar hlim hlawt Jiri Prochazka chu a inhliam avangin Glover Teixeira a hmchhawn thei dawn lo va, chuvang chuan a belt kawllai pawh a dah awl zui ta nghal a ni.
Prochazka hian a dar a tihnat avangin zai a ngai dawn a, thlaleh December ni 11 a fight lo awm tur UFC 282-ah hian Teixeira nen rematch an nei thei dawn lo. Hun rei tak a chawlh a ngaih dawn avangin light heavyweight title hi a thuamawp reng dawn avangin Prochazka chuan a title kawllai pawh a dah awl zui ta nghal, tunah chuan UFC light heavyweight champion a ni tawh lo a, a hmachhawn tur Glover pawh thlak nghal niin midangin UFC light heavyweight belt hi an inchuh tawh ang.
Hetia UFC main event-a inhnek tur Prochazka (29-3-1 MMA, 3-0 UFC) leh champion hlui Teixeira (33-8 MMA, 16-6 UFC) te an thulh tak si ah chuan Magomed Ankalaev leh Jan Blachowicz te’n light heavyweight hi an inchuh thung dawn a ni.
UFC lam chuan thuchhuah siamin, “UFC light heavyweight champion lai Jiri Prochazka chuan a darah hliam a nei a, zai a ngaih dawn avangin hun rei tak chawlh a ngai dawn. He inelna leh he division hi a zah em em a, chuvang chuan Prochazka hian a title kawllai hi a dah awl nghal a, a dam fel hunah a belt hi rawn la let ngei turin a lo let leh ang,” tiin.
UFC President Dana White pawhin Yahoo Sports hnenah heti hian a sawi, “He a dar hliam hi doctor in a hmuh khan UFC a thleng tawhah chuan a la nasa ber ang tiin min hrilh. A tha lo a ni, a tha lo tak zet! Inzaina hautak tak a hmachhawn dawn a, chu chuan hun rei tak a chawlhtir ngei dawn a ni,” tiin.
Jiri Prochazka leh Glover Teixeira te hi kumin June ni 12 khan light heavyweight title hi inchuhin an in-fight a, hetah hian round 5-na tawp lamah Prochazka hi submission hmangin a chak a, champion belt a hreng. Teixeira hian cho nawn lehin thlaleha in-fight leh tura tih ni mah se hetiang thil duhawm lo tak hi a thleng ta si a ni.
UFC 282 chu siksawi a ngaih tak avangin Jan Blachowicz (29-9-0 MMA, 12-6 UFC) leh Magomed Ankalaev (17-1 MMA, 9-1 UFC) te hi main event niin, light heavyweight title an inchuh dawn ta a ni.