Ronda Rousey chu July thla khian UFC Hall of Fame-ah lakluh a ni dawn.

Inrinni zan khan UFC Hall of Fame-a Ronda Rousey lakluh a nih tur thu hi an puang a. Rousey hi hmeichhe zingah UFC champion hmasa ber a ni a, 2012 atanga 2015 thleng khan bantamweight title a kawl a, vawi 6 chu a title hi a humhim hman a ni.

Rousey hi professional fight a hmachhawn hmasak 12-ah a chak a, heng fight 12-ah hian submission veka chak a nih mai bakah, a tam zawk hi minute khat aia rei lo chiah a ni hlawm a. UFC hmeichhe bantamweight bikah phei chuan chak rang ber panga zinga pali chu ama record siam a ni.

Judo champion hlui, Olympic bronze medalist ni tawh bawk Ronda hi UFC khawvelah chuan a thlen chinah record nei ropui pawl leh lar berte zingah a tel.

UFC president Dana White chuan, “UFC-ah hian Ronda Rousey awm lo se hmeichhia hi an awm a rinawm loh,” a ti a. “Ronda hi hmeichhe tana sulsutu a ni chiang a, hei mai bakah kei phei chu mimal takin min pui nasa hle a. Mi pawhin amah avang hian hmeichhe infiammi an en dan pawh a danglam tawh hle a ni,” a ti.

A sawi zelnaah, “Ronda Rousey hian UFC khawvela a thil tih tum chu a hlen chhuak vek a, khawvel hriatah a hming a chher a, mi ngaihsan leh entawn a ni chiang hle a. Tunah chuan hmeichhe fighter tha tak tak an awm teuh tawh a, hetiang dinhmuna kan din theih chhan hi Ronda vang liau liau a ni a. Hei vang tak hian UFC Hall of Fame-a Ronda lakluh a ni tur hi lawmawm kan ti tak zet a ni,” a ti bawk.

Ronda hi hneh theih loh anga ngaih a ni hman deuh a, mahse 2015 khan second round-ah Holly Holm chuan a knock-out a. Kum khat hnuah Octagon a luhchilh leh a, mahse an inbeih atanga second 48 chauh a kal hman tihin Amanda Nunes chuan a knockout ve leh a.

Hemi hnu hian Ronda hi MMA ah a inlar zui ta lo a, January 2018 ah WWE lamah a inziaklut ta daih a. Hmeichhe zingah chuan UFC Hall of Fame a tel hmasa ber a ni dawn a, a lakluhna hun hi Las Vegas khawpuiah an hmang ang.