Ciryl Gane-a hi La Roche-sur-Yon, France-ah April 12, 1990 khan a lo piang a, MMA lama a luhchilh hma hian hun eng emaw chen muay thai a khel hmasa.

MMA khawvelah hnehtu a la tawng lova, UFC a luhchilh hma hian MMA organisation TKO Major League-ah heavyweight champion a ni thin. UFC Interim heavyweight champion a nih tak avang hian UFC Heavyweight champion Francis Ngannou nen title fight an nei dawn a ni.

Muay thai Career

Gane hian June 4, 2016 khan professional muay thai bout hmasa ber a neih tumin AFMT Muay thai heavyweight title inchuh naah second round technical knockout-in Jeremy Jeanne a hneh. A vawi hnih inlan naah K1 Veteran fighter Brice Guidon lakah third round technical knockout-in hnehna a chang leh.

AFMT heavyweight title bout-ah Jonathan Gengoul chu first round-ah a KO. Hemi hnu lam pawh hian a tumpuite hi a hnehsawh miah miah zui hle a, Bangaly Keita third round tko hmanga a hneh hnuin  WBC Muay thai Champion rothap tak Yassine Boughanem-a lakah decision-in a chak zui.

MMA career

Kum 2018 khan MMA luhchilh chho a, Bobby Sullivan chu first round-ah rêk tlawmin TKO Major League-ah heavyweight champion a ni. A title chhuhsak tumtu  Adam Dyczka chu second round technical knockout-in a hneha, hemi hnu hian a hma aia reilo zawkin first round chhung lekin Rogers Souza a tuk tlawm leh. 

Ultimate Fighting Championship

Khawvel MMA organisation lian ber UFC-ah August 10, 2019 atanga khel chhovin round hmasa berah Raphael Pessoa chu arm triangle choke-in a hneh. October 26, 2019 khan khel leh nghalin Don ar Mayes chu third round-ah heel hook submission hmangin a hneh zui. Octagon chhunga a vawi thum inlan naah December 21, 2019 khan Tanner Boser lakah unanimous decision-in a chak leh bawk.

A kum leh December 2020-ah UFC heavyweight champion hlui Junior Dos Santos chu round hnih naah a tuk tlawm leha, heta tang hian fighter lar tum chho zelin Jarzinho Rozenstruik leh Bellator Heavyweight Champion hlui Alexander Volkov-te chu decision hmangin a hneh ve ve bawk.

August 7, 2021 khan Interim heavyweight championship match-ah  UFC Heavyweight fighter zinga a tumpuite knockout hnem ber Derrick Lewis chu sawp hrepin round thumnnah a hnek tlawm a, interim heavyweight champion thar niin, heavyweight champion Francis Ngannou nen rokhawlhna a awm lemlo anih chuan an innuai thuai ang.