Tun Pathianni zingah UFC 217 neih a ni dawn, UFC welterweight champion tawh zinga tha bera zinga ngaih George St Pierre leh Middleweight champion lai Michael Bisping te an innuai dawn ta e. MMA Fight of the year tura rin a ni bawk.
Tu nge George St Pierre chu?
MMA fighter tha sawi tawh apianga lam rik ve ziahte zing ami niin; khawvel fighter piang tawh zinga tha ber pawla ngaih theih a ni. UFC-a a luh hma hian UCC ah khel phawtin Welterweight Champion a lo ni tawh thin. Fighter hmasawn zel duh a nih vangin fight engemaw zat a neih hnuah UFC lamah a lut ta a, a fight hmasak ber atangin mipui tan a hlawh nghal hle.
A fight a that em avangin UFC President Dana White pawhin a duhsak hle nghe nghe, rei lote chhungin title fight a nei nghal. Championship fight a neih hmasak berah Matt Hughes nen an intum tir a, experience a la neih tlem deuh avangin Round 1 lekah submission in a tlawm.
Heta a chak loh atang hian a inzir nasa hle a, fight a neih leh apiangin hmasawnna a nei ta zel a, Sean Sherk te leh fighter tha tak tak a hneh ta nual mai. A fight a that chhoh tak em avangin title fight a hmu leh ta hlauh mai a, a lo hneh tawh loh Matt Hughes hmachhawn lehin round 2 chhung lekin champion lai a hneh ta mai. Matt Serra lakah a belt a humhim a ngai, mi tam takin GSP hi chak turah an dah, an in-fight a lo thlen erawhin champion lai a tlawm ta der mai. Title lak let leh ngei tumin a bei leh ta sauh sauh a, Serra nen hian title fight-ah inhmachhawn nawn lehin, GSP hian a hnek tlawm ta nge nge a ni.
Title fight a nei chho ta zel a; fighter tha Josh Koscheck, Jon Fitch, Carlos Condit, Nick Diaz, Johny Hendricks,etc. lakah a title a humhim. Vawi 9 lai a title a humhim a, a chawlh thleng hian chhuhsaktu an awm lo.
Michael Bisping ve thung
Pride and Glory 2 ah MMA a khel tan a, heta tang hian Cage Warrior lamah khel chho lehin light heavyweight champion a ni ta nghe nghe. A vawi khatna atan awlsam takin title a humhim a, hemi zawh hian UFC-ah inlan lehin a champion zui bawk. Champion tura beisei ber pawl te zing ami a ni a, nimahsela title fight nei theilo chiahin a awm leh thin.
A kum rualpui ten MMA an chawlhsan ta zela, fighter naupang leh tha zawk an piang chhuak zel bawk nen, heng hunahte hian beidawng duh lovin a inzir belh zel thung. UFC 199 main event fight turah Chris Weidman a inhliam tak avangin Luke Rockhold nen in-fight tura koh a ni ta thut maia, kar hnih lek inbuatsaihna hun awm tawhah champion lai Luke Rockhold nen an intum a lo ngai ta.
An fight hun a lo thlen meuh chuan chak zawk tura ngaih champion lai Rockhold a tukzal ta riap mai. Fight zawha a interview naah pawh mipui lamin an au nasa a, UFC Middleweight ni thei tura puitu leh thlawptute chungah lawmthu a sawi zui bawk. A title humhimna vawi khatna atan; UFC 100 a lo knockout tawhtu Dan Henderson a hmachhawn a, round tir lamah Hendo a kuttum a dawng nual. Vawi eng emaw zat chu khel thei tawh lo tur khawpin a awm thin, mahse champion a nihzia rawn pholangin decision hmangin a chak hram. Hemi hnu hian title defend a la nei leh rih lo.
Fight Of the Ages
George St Pierre vs Michael Bisping te intum tur hi MMA fight tawh zawnga hmuhnawm thei ber tura ngaih a ni a, middleweight category-a fight ngailo, welterweight fighter tha bera ngaih George St Pierre hian wrestling hmangin a tumpui te lakah hnehna a chang leh mai thin.
Michael Bisping-a lakah erawh a pawmchilh hma hauhvin knockout a dawng ang nge? Wrestler tha a nihzia a rawn lantir leh dawn? November ni 5 hian an in-fight anga, Pathianni zing dar 7:30 velah Sony ESPN-ah UFC 217 hi en theih tan a ni ang. St Pierre tan fiahna hautak a ni dawn. GSP hi UFC Welterweight leh Middleweight Champion hmasa ber a ni dawn nge? Mualpho takin a tlawm zawk dawn?