Eric Cantona chu midangte nunkhaw nawmna atana a inhman nasat avangin 2019 UEFA President’s Award dawng turin an thlang.

Kum 53-a upa Eric Cantona hi Nilaithawhtanah hian Monaco khawpuiah chawimawina hi an hlan dawn a. He chawimawina lo dawng tawh player ropui tak takte huangah Cantona hi a awm ve thei tawh dawn a ni.

UEFA President Aleksander Ceferin chuan, “He chawimawina dawng thei tur hian Eric Cantona vanglai chauh kan thlir lo a. Khawvela player tha berte zinga mi a nih piah lamah, a mihring mihrinna tha tak avanga thlang chhuak kan ni,” a ti.

“Cantona hian inremsiamna lampang a ngaina lo a, a ngaihdan chu nghet takin a keng kawh tlat thin a. A rilrua a vei tawh chu zep nei hauh loin a sawi chhuak mai thin a, thil tha nia a hriat tawhah chuan a rilru leh thinlung a pe vek mai zel a ni,” a ti bawk.

Cantona hian 1992 kumah khan Leeds United chu First Division title a lakpui a, hemi hnuah hian Old Trafford lamah a insawn a, Manchester United chu Premier League title vawi 4 a lakpui bakah FA Cup trophy pawh vawi 2 chu a lakpui bawk a ni.

Manchester United tan hian Cantona chuan game 143 a khel hman a, hengah hian goal 64 zet chu a thun hman a. 1993 kumah khan United chu English league title a lakpui a, kum 26 chhunga league title an lak leh theih hmasak ber a ni.

Kum 30 mi niin 1997 kumah khan inkhelh a chawlhsan a, hemi hnuah hian beach soccer te a khelh bakah lemchan khawvel lamah te a hun a hmang chho bawk a. Midangte tanpui kawngah nasa takin a inhmang chho thin.

Aleksander Ceferin ang bawkin Eric Cantona chu khawvel puma football hmanga midangte tanpuitu lian tak Common Goal thlawptu a ni a. Ceferin leh Cantona te hian kum khata an hlawh atanga 1% chu he project atan hian an hlan thin a. Common Goal din chhuaktu zingah hian Manchester United midfielder Juan Mata pawh a tel a ni.

UEFA President’s Award hi a hmain Alfredo Di Stéfano, Sir Bobby Charlton, Eusébio, Raymond Kopa, Johan Cruyff, Francesco Totti leh David Beckham te pawhin an lo dawng tawh a ni.