Nilaini zan lai khan, UEFA Champions League group stage khelh zawh fel a ni a, heti hian Round of 16 khel tur te kan hre kim tawh a, kar leh Thawhtanniah Round of 16 inkhel tur te pawh a ni ang.

Napoli, FC Porto, Bayern Munich, Tottenham, Chelsea, Real Madrid, Manchester City, Benfica, Liverpool, Club Brugge, Inter Milan, Eintracht Frankfurt, AC Milan, RB Leipzig, Borussia Dortmund leh Paris Saint-Germain te chuan Round of 16 an lut.

Nilaini zanlai inkhel te:

Group E-ah Round of 16 lut chiang tawh Chelsea chuan Stamford Bridge-ah Croatian club Dinamo Zagreb an lo mikhual a, Chelsea hian 2-1 in an mukhual te hi lo an lo hneh.

Chelsea tan hian Raheem Sterling bakah, Denis Zakaria te chuan goal an khung a, Dinamo tana goal khungtu hi Bruno Petkovic a ni. Dinamo lam hian goal an khung hmasa a, mahse Chelsea hian lehthalin, Chelsea goal hnihna khungtu Zakaria hian Chelsea tana a game hmasa ber khelin goal a khung nghal a ni.

Group E inkhel dangah Serie A champion lai AC Milan chuan Austrian champion Red Bull Salzburg chu San Siro-ah si li faiin an sawp bawka, AC Milan hi Round of 16 khel turin an inpet tling.

AC Milan tan hian French striker Olivier Giroud chuan goal hnih a thun bakah, Rade Krunic leh Junioe Messias te chuan goal khat ve ve an khung bawk.

Group E-ah hian Chelsea chu pakhatna an ni a, point 13 an hlawhchhuak. AC Milan chuan pahnihna dinhmun hauhin, anni hian point 10 an nei a, point 6 neiin Salzburg chu pathumnaah an awm a, point 4 nei Dinamo Zagreb chuan palina dinhmun an hauh ve thung a ni.

Group H-ah Juventus chuan Turin-ah French heavyweight Paris Saint-Germain an lo mikhual a, mikhual lam PSG hian 2-1 in hnehna an chang.

PSG tan hian Kylian Mbappe leh Nuno Mendes te chuan goal an khung a, Juventus goal neihchhun hi Italian defender Leonardo Bonucci-a thun a ni.

Group H inkhel pakhat zawkah, Benfica chuan Maccabi Haifa an tlawh a, 6-1 ngawtin Portuguese club Benfica hian khual mualah hnehna an chang.

Benfica tan hian Goncalo Ramos, Petar Musa, Alex Grimaldo, Rafa Silva, Henrique Araujo leh Joao Mario te chuan goal khat theuh an khung a, mual neitu lam tana goal khungtu hi Tjaronn Chery a ni.

Benfica leh PSG te chuan point 14 ve ve an hlawhchhuak a, head to head-ah 1-1 ve ve in Benfica home leh PSG home-ah an inhnehtawk a, an goal difference pawh 9 ve ve niin, goal against pawh 7 ve ve a ni bawk a, hetiang a nih avang hian group stage-a away goal khung hnem zawk Benfica chu pakhatnaa awmin, PSG hian pahnihna dinhmun an hauh ve thung. Pathumnaah Juventus awmin, palinaah Maccabi Haifa an awm a, Juventus leh Maccabi te hian point 3 ve ve an nei a ni.

Group G ah Premier League champion lai Manchester City chuan, Spanish club Sevilla an lo mikhual a, 3- in City hian an mualah hnehna an chang.

Etihad Stadium-ah hian City tan kum 17 mi Rico Lewis, Julian Alvarez leh Riyad Mahrez te chuan goal khat theuh an khung a, Sevilla goal khat khungtu hi Rafa Mir a ni.

Group G inkhel dangah Borussia Dortmund chuan FC Copenhagen tlawhin, 1-1 in an inhnehtawk a, Copenhagen tan Hakon Amar Haraldsson chuan goal khungin, Dortmund tan hian Thorgan Hazard chuan goal a khung bawk.

Heti hian Group G-ah point 14 neiin Manchester City chuan pakhatna dinhmun an hauh a, point 9 nei Dortmund chuan pahnihna dinhmun an hauh ve thung. Pathumnaah point 5 nei Sevilla an awm a, point 3 neiin Copenhagen chu Group G mawng berah an awm a ni.

Group F-ah Real Madrid chuan Santiago Bernabeu-ah Celtic an lo mikhual a, La Liga champion lai hian 5-1 in Scottish champion Celtic hi an lo sawp.

Real Madrid tan hian Luka Modric leh Rodrygo te chuan penalty spot atangin goal an khung a, Marco Asensio, Vinicius Junior leh Federico Valverde te chuan goal khat theuh an khung bawk a, Celtic goal hi Jota thun a ni.

Group F inkhel dangah German club RB Leipzig chuan Ukraine-ah Shakhtar Donetsk chu si li faiin an hneh a, Christopher Nkunku, Andre Silva, Dominik Szoboszlai te chuan goal khat theuh khungin Shakhtar player Valeriy Bondar chu a own-goal bawk.

Group F-ah hian Real Madrid chu pakhatna an ni a, point 13 an hlawhchhuak. RB Leipzig chu pahnihnaah awmin, point 12 an nei a, point 6 nei Shakhtar chu pathumnaah awmin, point 2 chiah hlawhchhuak Celtic chu palinaah an awm ve thung a ni.