UEFA Champions League quarter final second leg inkhelah champion lai Chelsea chuan Santiago Bernabeu-ah Real Madrid hneh mah se an tlang zo lova, Real Madrid hian semi final an lut.
First leg-ah Chelsea hian Stamford Bridge-ah Real hi 3-1 in an hneh lova, second leg inhkhel hmuhnawm takah Chelsea an rawn come-back teuh hle a, mahse a tawpah erawh 3-2 in an chak a, aggregate-ah 5-4 in Real Madrid an chak avangin Chelsea hi an tla a, Real hian semi final-ah Premier League champion lai emaw La Liga champion lai emaw an hmachhawn dawn a ni.
Second leg-ah hian Real tan Rodrygo leh Karim Benzema te chuan goal an khung a, Chelsea tan hian Mason Mount, Antonio Rudiger leh Timo Werner te chuan goal an khung ve bawk.
Chelsea an khel tha hle a, an formation leh tactic leh thil dang te a fuh vel vek a ni ber a, 90mins chhunga chungnung zawk pawh an ni chiang a, chance pawh insiam hnem mah se an hlah nasa bawk a, an chance tha hlah tak te an ui hle in a rinawm.
Chelsea manager Thomas Tuchel chuan first leg-a hnawk em em Vinicius Junior chu Reece James a man-mark tir a, James hian Vinicius hi a chang hnah viau a, first leg ang ngawtin Brazilian forward hi a che thei lo.
A tir phat atangin goal hniha hnufual zawk Chelsea-in Real hi an nawr nghal a, goal pawh an khung har lova, khelh tan atanga 15mins-ah goal an khung nghal; Chelsea goal hmasa ber hi Mount-a thun a ni a, English midfielder hian box chhung atangin chiang takin goal-ah ball a pet luta Chelsea hma a hruaipui.
Chelsea an phur tulh tulh a ni ber a, mahse first half-ah hian goal khat bak a lut lo. Chelsea hian second half tan atanga minute sawm pawh an khelh hmain an goal hnihna an thun a, German defender Rudiger chuan goal-ah ball tauh lutin, si hnih faiin Chelsea-in hma an hruai a, aggregate-a 3-3 a ni chiah.
Darkar khat chuang hret an khelhin Marcos Alonso chuan box chhung veilam atangin goal-ball a pet lut a, Chelsea hian 3-0 in hma hruai zet mah se, VAR lama endik a nih hnuah Alonso hi ball a control na lamah a hand-ball avangin goal hi sut leh a ni.
Chelsea hian an goal sut sak a nih atanga minute sawm hnu velah an goal thumna an khung ta tho a, Werner chu through ball pek a ni a, Werner hian box chhungah ball la in, Real defender te a bum hnuah goal a khung a, si thum faiin Chelsea hian hma an hruai a, aggregate-ah 4-3 in hma an hruai ta bawk.
Aggregate-a hma an hruai hnu lawkah Real hian goal an rawn khung a, Luka Modric chuan mual veilam atangin box chhunga dik zetin ball a dah lut a, far post lama tlan lu Rodrygo chuan mawi takin goal-ah a lo tlawh lut a, 3-1 niin, aggregate-ah 4-4 a ni chiah bawk.
Chelsea Real hi nawr hle mah se goal an thun thei tawh lova, London club hian an chance neih te an hmang tangkai tawk lova, Real erawh goal hmaah an hriam hle. 90mins an khel zo a, aggregate-ah 4-4 a nih avangin Extra Time khelh a ni.
Extra Time-ah hian minute nga chuang awrh an khelhin Real in goal an rawn khung leh a, first leg-a hat-trick siam tawh Benzema chuan veilam atanga Vinicius-a’n ball a pek chu goal-ah lo tauh lut a, he goal hi Real hian semi-final an luhpui ta a ni.
Sawilan angin Chelsea hi goal hmaah an hriam tawk lova, a tir atanga a tawp thlengin Chelsea hian chance tha tak tak insiam fo mah se, goal thum bak an khung theih loh avangin an tlang zo lo. Shot an in ngah hleih hle a, Chelsea hian shot 28 lai an neih laiin Real hian 10 bak an nei lo.
Ball chan tam lamah an inthlau lo hle a, Chelsea ball possession 57% an nei a, Real hian 43% an nei ve thung a, Chelsea hian corner vawi 10 lai an hmuh laiin Real hian vawi khat bak an hmu lo a ni.
