UEFA Champions League Round of 16 first leg inkhelah Ligue 1 hmahruai mektu Paris Saint-Germain chuan La Liga hmahruai mektu Real Madrid an lo mikhual a, si khat faiin PSG hian hnehna an chang.

He inkhela goal awmchhun hi French forward Kylian Mbappe-a khung a ni a, PSG hian second leg-ah goal khata chungnung zawk sa in Real Madrid hi Santiago Bernabeu-ah an tlawh ang.

PSG 1-0 Real Madrid

(Mbappe 90+3’)

Player Ratings

Team hnihte an fimkhur dun viau a, PSG hi an nawr na zawk a, team hlauhawm zawk pawh an ni a, inkhel pawh an thunun zawk tih theih a ni a, Real hian inkhelh chhung zawngin shot on target an nei lo.

17mins-ah Mbappe chu a kangin through ball pek a ni a, Mbappe hian box chhungah ball a um lut a, rem lo tak chungin shoot mah se Courtois-a’n a lo dan sak a, PSG in corner an hmu. Corner atang hian Lionel Messi chuan ball a vawrh lut a, PSG-in chance nei leh mah se, Courtois a lo awm leh.

First half-ah Real midfielder pawimawh Casemiro chu Paredes a tihtluk avangin yellow card pek a ni a, Brazilian midfielder hian second leg a khel thei dawn lo. Second half tir lamah PSG-in chance an nei a, Mbappe chu box chhungah ball pek niin, French forward hian Real defender pahnih inkar atangin a shoot a, Courtois-a’n a lo save.

Darkar khat an khelhb tlin hma lawkin box veilama Mbappe ball khalh chu Dani Carvajal chuan a titlu a, PSG hian penalty an hlawhchhuak. Penalty pet tur hian Messi a rawn penchhuak a, mahse Messi penalty hi Real goalkeeper Courtois chuan chiang takin a save a, PSG-in hmahruai theihna hun tha tak an neih an bawhpelh.

Goal awm lovin PSG leh Real te hi an inhnehtawk dawn emaw tih hnuah Mbappe chuan injury time-a minute thum a kal hnuah goal mawi tak a khung a, veilam atangin box-ah ball a lalut a, Real defender pahnih a bum hnuah far post lamah ball a pet lut zui a, PSG chakna goal a khung, 1-0 hian inkhel a tawp a ni.