UEFA Champions League Group B inkhelah Liverpool chuan Wanda Metropolitano-ah Atletico Madrid an tlawh a, 3-2 in mikhual lam Liverpool hian La Liga champion lai hi an hneh.
Mual neitu lam Atletico tan hian Antoine Griezmann chuan goal hnih khung mahse Griezmann hi second half tir lamah hnawhchhuah a ni a, Liverpool tan Mohamed Salah chuan goal hnih a khung bakah Naby Keita chuan goal khat a khung bawk.
Group B inkhel dangah FC Porto chuan an mikhual AC Milan chu si khat faiin an hneh ve bawk a, heti hian Group B-ah Liverpool chu hmahruaitu niin, khelh thumah point kua an hlawhchhuak tawha, pahnihnaah Atletico awmin, anni hian point li an hlawhchhuak tawh bawk. Pathumnaa awm Porto pawhin point li an nei a, AC Milan chuan point hlawhchhuak la nei lovin, a tawp berah an awm a ni.
Liverpool leh Atletico te inkhelah hian Liverpool-in minute sawm pawh an khelh tlin hmain hma an hruai a, Salah chuan player pathum a bum hnuah goal-ah ball shoot in, khawih per sak ni mahse goal-ah a lut a, inkhela goal hmasa ber a khung. Salah hian record thar a siam a, Liverpool tan competition zawng zawnga a zawna game kaw chhung goal khung thei hmasa ber a ni.
Salah goal khung hnu lawkah Liverpool goal hnihna a lut a, Keita chuan yard 20 vel laia hla atangin Atletico goal top corner-ah mawi zetin ball a volley lut a, si hnih faiin Liverpool hma a hruaipui.
Atletico hian an mikhual lam hi an chhanglet har lova, 20mins-ah Griezmann chuan Koke-a ball cross chu goal-ah lo chantirin, 2-1 a ni. Darkar chanve chuang hret an khelhin Griezmann bawk hian Atletico si phurh a rul zo a, Joao Felix hnen atanga a ball dawn chu Griezmann chuan mawi takin goal-ah a chan tir leh a, 2-2 in first half a tawp.
Second half-ah minute sawm pawh an khelh tlin hmain Atletico tana khel tha ber Griezmann chu Roberto Firmino laka a foul dan avangin direct red card pek niin, hnawhchhuah a ni. Player tam zawkin khel mahse Liverpool-in inkhel an thunun thei bik lova, mahse 80mins an khelh tlin hma hretin an vannei a, penalty an hlawhchhuak.
Mario Hermoso chu Diogo Jota lakah a foul a, box chhung a nih avangin Liverpool hian penalty hlawhchhuakin, Salah a rawn penchhuak a, penalty spot atangin Egyptian forward hian Liverpool goal thumna a khung. Atletico hian penalty hlawhchhuah nei ve zet mahse VAR lama endik a nih hnuah referee chuan penalty a pek zet tawh chu a sut leh a, 3-2 in Liverpool hi an chak ta a ni.
Atletico Madrid 2-3 Liverpool
(Griezmann 20’, 34’) (Salah 8’, 78’pen, Keita 13’)
Player Ratings
ATLETICO: Oblak 6, Trippier 6, Felipe 6, Kondogbia 6, Hermoso 5, Carrasco 7, Lemar 6, Koke 7, De Paul 6, Joao Felix 7, Griezmann 7. Subs: Gimenez 6, Luis Suarez n/a, Correa n/a, Lodi n/a, Llorente n/a.
LIVERPOOL: Alisson 8, Alexander-Arnold 6, Van Dijk 6, Matip 6, Robertson 6, Keita 6, Milner 6, Henderson 6, Salah 7, Mane 6, Firmino 6. Subs: Fabinho 6, Jota 6, Oxlade-Chamberlain 6, Gomez n/a, Williams n/a.
