2021-22 season atana UEFA Champions League chu nizan khan khelh tan a ni a, champion lai Chelsea chuan hnehna an chang a, United erawh an tlawm.
Chelsea chuan Stamford Bridge-ah Russian club Zenit St.Petersburg an lo mikhual a, Chelsea hi Romelu Lukaku goal khat hmangin an chak.
Inkhela goal awmchhun hi 69mins-a lut a ni a, Chelsea captain Cesar Azpilicueta ball cross dik zet chu Lukaku chuan goal-ah a lo tauh lut a, hei hi Chelsea chuan an chakpui ta a ni.
Chelsea 1-0 Zenit St. Petersburg
(Lukaku 69’)
Player Ratings
Manchester United chu Switzerland-ah zinin, Swiss champion Young Boys an tlawh ve thung a, 2-1 in United hi an tlawm.
Inkhel tan atanga minute sawm leh tlem khelh a nihin United hian hma an hruai a, Bruno Fernandes-a pass dik leh fing tak chu Cristiano Ronaldo chuan a positioning dik tak hmangin a lo la a, goal-ah chantir zuiin United-in hma an hruai.
Darkar chanve chuang an khelh chho a, Aaron Wan-Bissaka chu a ma ball lak sual a umna lamah Martins-a lakah a foul a, referee chuan Wan-Bissaka hi hnawtchhuakin, player 10-in United hi an khelh a ngaih phah.
1-0 hian first half a tawp a, 70mins khelh a nih hma deuhin mual neitu lam Young Boys hian an si phurh an sut. Elia cross chu Moumi Ngamaleu chuan goal-ah a lo khung a, 1-1 a ni.
Team hnihte hi an inhnehtawk mai dawna a lan hnuah Young Boys hian injury time-ah goal an rawn khung a, Jesse Lingard chuan an goalkeeper David de Gea chu ball pek tum mahse Theoson Siebatcheu a hmu lo; Siebatcheu hian a hun tha hmang tangkaiin goal-ah ball a khung a, 2-1 in Young Boys hian Manchester United lakah hnehna an chang ta a ni.
Young Boys 2-1 Manchester United
(Ngamaleu 66’, Siebatcheu 90+5’) (Ronaldo 13’)
Player Ratings