Thawhlehni zan khan UEFA Champions League group stage khelh chhunzawm a ni a, Bundesliga champion Bayern Munich chuan an mikhual Barcelona an hneh.

Bayern hian si hnih faiin hnehna an chang a, Bayern tana goal khungtu te hi Lucas Hernandez leh Leroy Sane te an ni.

Group C-ah Bayern hi hmahruaitu an ni a, khelh hnih an khelh tawhah la chak ve ve in, point 6 an nei. Barcelona hian khelh hnihah point 3 an nei a, pahnihnaah an awm ve thung. Group C-ah hian point 3 tho hlawhchhuak tawh Inter Milan chu pathumna an ni a, Viktoria Plzen chuan point hlawhchhuah la nei lovin, palina dinhmun an luah a ni.

Nipui bazar laia Bayern chhuahsana Barcelona pan Robert Lewandowski chu Bayern a chhuahsan hnuah a vawi khat nan Allianz Arena-ah a inkhel a, a team a chakpui theih loh bakah goal khung a nei lo bawk.

Polish striker hian first half-ah chance tha tak tak nei mah se, a chance neih te a hmang tangkai thei lova, a chance neih pahnih Manuel Neuer leh Noussair Mazraoui ten an block sak a, cross bar a tauh khum bakah, volley pakhat a miss bawk a ni.

First half a hmuhnawm a, team hnih te an innawr tawn zak zak a, lehlam lehlamah chance kan hmu a, Barcelona tan Gavi, Pedri leh Raphinha ten chance nei bawkin, Bayern pawhin chance tha tak tak neiin, goal erawh first half-ah an khung lo.

Second half an tan hnuah erawh thil a danglama, second half-a minute sawm pawh an khelh tlin hmain Bayern-in goal hnih an khung. Corner atanga Joshua Kimmich-a ball vawrh luh chu Hernandez chuan goal-a a khung hnuah, Jamal Musiala pass chu Sane chuan chak taka tlanpuiin, goal-ah a khung zui a, 2-0 in Bayern hi an chak ta a ni.