UEFA Champions League Round of 16 second leg inkhelah Thawhlehni zan lai khan Manchester United chuan Old Trafford-ah Atletico Madrid an lo mikhual a, mikhual lam Atletico hian si khat faiin hnehna an chang.

First leg-ah team hnihte hi 1-1 in Wanda Metropolitano-ah an lo inhnehtawk tawh a, aggregate-ah 2-1 in Atletico hi an chak a, Quarter finals khel turin an inpet tling a, United tan erawh an zinkawng a tawp ta rih a ni.

United hian tun season-ah trophy chawi theih an nei tawh lova, kum nga chhung trophy chawi lovin an awm dawn tihna a ni. United forward Cristiano Ronaldo chuan kum 16 chhungin a vawi khat nan trophy a chawi dawn lova, season thara Champions League khel tura United hi an inpet tlin zawh loh chuan kum 37 mi hian Old Trafford a chhuahsan ngei a rinawm ta hle.

Quarter final lut tawh hi team paruk an awm a, Atletico bakah hian Bayern Munich, Benfica, Liverpool, Manchester City keh Real Madrid te niin, team hnih dangin an la belh leh dawn a ni.

Old Trafford inkhelah hian La Liga champion lai Atletico hi Renan Lodi-a goal khat hmangin an chak a, goal awmchhun hi half time hma lawka lut a ni. 41mins-ah Lodi chuan Antoine Griezmann-a ball cross chu goal-ah a lo tauh lut a, goal pawimawh tak niin, Atletico-in hnehna an chanpui.

First half a hmuhnawm a, United hi an khel tha zawk tih theih ni mah se goal erawh an khung thei lova, first half-ah United tan Anthony Elanga chuan chance tha tak a nei a, mahse a shot chu Atletico goalkeeper Jan Oblak chuan a lo save.

Second half-ah pawh United khel chhe lem lo mah se goal hmaah an hlauhawm tawk lo hle a, an tlarhnung a khawng tawk loh zia kan hmu zeuh zeuh bawk. Jadon Sancho leh Raphael Varane te chuan half chance an nei a, goal erawh an khung lo tluan a, Atletico hian Old Trafford-ah hnehna pawimawh tak changin, Quarter final an lut ta a ni.

Manchester United 0-1 Atletico Madrid [agg 1-2]

(Lodi 41')

Player Ratings