Zanin zanlai dar 1:30-ah Manchester United chuan Old Trafford-ah French club PSG an mikhual dawn, Champions League last 16 first leg-ah hian PSG hian player pawimawh inhliam an nei nual, he hun hlu tak hi United lam hian an hmang tangkai thei angem?
Neymar chuan UCL last 16 1st leg leh 2nd leg a khel thei dawn lo chiang a, Bordeaux an hneh tuma inhliam Cavani pawh Old Trafford-ah a inlan thei dawn lo tih PSG coach Tuchel-a'n a sawi chiang.
French Cup-a si hnih faia Strasbourg an hneh tuma inhliam Neymar chu kar 10 emaw tal a chawlh a ngai dawn a. Right-back Thomas Meunier pawh Old Trafford-ah a inlan thei dawn lo bawk a, hetih lai hian Marco Verratti erawh kheimit hliam nei mahse 1st leg-ah hian a inlan theih beisei a ni.
"United hian Pogba leh Rashford chhawr thei lo ve ta se, chuatiang vel chu a ni Cavani leh Neymar inlan thei lo tur hi. Neymar hi Europe-a player tha per pakhat a ni a, kan mamawh khawp mai, Cavani pawh kan chhawr thei dawn lo bawk a nih hi," tiin Tuchel chuan a sawi.
Kylian Mbappe chu regular player hmatawng pathum zinga chhawr theih awmchhun a ni a, Cavani leh Neymar hmunruak luahkhat tur ni lovin, ama game pangngai khel tura an chhawr tur thu Tuchel chuan a sawi bawk. Tin, Tuchel hian Old Trafford-ah goal khat aia tam khung an inbeisei thu a sawi tel bawk a ni.
Ole Gunnar Solskjaer chuan player inhliam pahnih chiah a nei a, Valencia leh Darmian te bak chu an fit tha vek. Fulham an hmachhawn tuma bench-a awm Marcus Rashford, Alexis Sanchez leh Jesse Lingard te chu Solskjaer chuan zanin hian a start tir an rinawm. Domestic game-ah tha takin United an khel mek, hetiang game hi Europe-ah pawh khelh chhunzawm zel Solskjaer chuan a duh.
"Player te leh supporter-te chuan hmasawn zel an duh a, UCL-a United tana ka inlan hnuhnung berah khan 7 -1 laiin Roma kan sawp, Old Trafford- ah zan nuam tak kan hmang.
"Away-ah khan 2-1 in chak lo mah ila manager ho khan kan hlim hle. Khatiang tur kha a ni, keimahni mualah chuan hnehna kan chang tur a ni. Ka player-te laka ka phut chu inrintawkna nena game khelh a ni," tiin Solskjaer chuan a sawi.
European Champions vawi thum lo ni tawh United hi tun hnai Champions League knock out stage game 9-ah vawi khat chiah hnehna an chang a, Kum 2014 March thla khan David Moyes-a hnuaiah 3-0 in Olympiakos an hneh a nih kha. Khami hnu khan last 16 bak an pel tawh lo.
PSG hi Europe champion nih tuma theih tawpa player leikhawm an ni a, hetih lai hian an tum ram an la thleng thei rih lo. Player pawimawh pathum inhliam nei mahse tunah hian squad chhah tak an nei mek tho a, United tan chuan team hmachhawn hautak tak an la ni cheu dawn tho niin a lang.
Solskjaer-a hnuaiah United-in chak loh an la nei lo, an game pawh a mawi chho hle bawk a, attacking football hmuhnawm tak an khel mek.PSG lamin away-a goal hnih emaw tal khung tumin hlauh nei lovin an nawr dawn tih a chiang, chutih laiin United pawhin Old Trafford-a hnehna chan ngei an tum dawn bawk. Team hnih te attacking football khel ve ve tura beisei an ni a, inkhel hmuhnawm tak a ni dawn chiang e.