UEFA Champions League quarter final inkhelah Bayern Munich leh Sevilla te chu goal thun loin an inhnehtawk a, first leg-ah Bayern hi 2-1 a an lo chak tawh avangin semi final-ah an tlang chho.

Jupp Heynckes pawlte leh Andalusian ho inkhel hi chuti taka hmuhnawm a ni lem lo a, che tha zawk sawi tur an awm chuang lo a, an khelh danah pawh an intluk tawh hle. A vawi 28-na atana Bundesliga champion hlim hlawl Bayern Munich hian Vincenzo Montella naute hi an draw pawhin semi final an lut thei tih an chian avangin tha pui an thawh duh vak lo a ni ber.

Kum 5 chhunga a vawi khatna atan Bayern hian UCL knockout stage-a Spanish club an hneh leh hmasak ber a ni a. Die Roten hian 2013 khan Barcelona lakah goal 7 ngawt thunin an hneh a, hemi hnu hi chuan Champions League atangin Spanish club hlirin an pet chhuak ta ziah a ni.

2014 khan Real Madrid chuan 5-0 in an hneh a, 2015 ah Barcelona chuan 5-3 in an nawr chhuak bawk a. Atletico Madrid nen 2016 khan inkhelin 2-2 in inhnehtawk mahse away goal vangin Atletico hi an tlang a, 2017 ah Real Madrid chuan 6-3 in an hneh bawk a ni.

Sevilla hneha semi final an luh hian Bayern Munich hi kum 9 chhungin vawi 7 chu semi final an lut ta a. Allianz Arena ah hian an che chhe ngai lo viau bawk a, 2013 treble winner te hi tun season chhungin an khelmualah an khelmualah an la tlawm lo a, Champions League bikah phei chuan an la chak vek a, Sevilla lakah chiah hian an chak zo ta lo.