Champions League no mawi chawi chu Mbappe-a hmathlir a ni a, mahse Paris Saint-Germain chhuahsan lam a erawh ngaihtuah lem lo.

Mbappe leh Real Madrid sawi zawm an ni reng a, Real Madrid a zawm dawn nia ngaih a nih hnuin Paris club-ah contract thar a ziak leh a nih kha.

Inrinnia Nantes laka hnehna an chan khan Mbappe chuan PSG tana goal khung tam ber record a siam a, kum 24 mi hian Edinson Cavani-a goal record 200 chu a khum a ni. Mabappe hian goal 201 nei turin game 247 chiah a khel. Cavani erawhin goal 200 khung turin game 301 a khel thung.

Mbappe hian kum 2018 khan France chu World Cup no mawi a chawipui a, Ligue 1 title pawh 5 a hlawh chhuak tawh bawk. Champions League erawh a kutah a la awm thei lo. Kum 2020 khan UCL no mawi a chawi ve teuh hle, mahse final-ah Bayern Munich an hneh zo ta lo a ni.

"Champions League no mawi chawi hi ka hmahuna ka dah a ni a, kan club-in la chawi thei lo mah ila, kan hmachhawp a ni.

"Hetah hian ka hlim lutuk a, tunah hian Paris Saint-Germain hlim taka siam bak hi ngaihtuah ka nei lo. 

"PSG tana goal khung hnem ber ka ni hi ka lawm a, hun ropui tak a ni. Mahse Bayern kan hneh loh hnuah vawi 3 a zawna kan chak thei hi team tan a lawmawm.

"Team anga hlawhtlinna hi a pawimawh hmasa ber. Munich kan hmachhawn leh hun atana kan inpeih a pawimawh hle bawk.

"Goal ka khung belh zel thei ang em hriat a ni lo a. Kan inringtawk a, chutih rualin team tha tak kan hmachhawn dawn avangin zamna a awm ve deuh," tiin Mbappe chuan a sawi a ni.