Nilaini zan khan Champions League match-ah Bayern Munich chuan Benfica an mikhual a, Musiala goal hmangin si khat faiin German club an chak.

Hnehna chang mah se Bayern Munich chuan chhiat an tawk, an supporter pakhat an chan tlat mai. Inkhel en zinga pakhat chu buaipui ngaiin a awm a, damdawi in panpui an nih laiin a boral a, hemi chungchang hi Bayern Munich chuan Ningani khan an puang.

Allianz Arena chhim lam (Sudkurve)-a awm ho hi Bayern Munich Ultras an ni a, hemi zinga pakhat chu inkhel en laiin medical team lamin an buaipui. Aurinna hmangin supporter pakhat chuan an thawm tizawi turin fans chu a hriattir nghe nghe.

Buaipui a nih chhung hian fans thawm a reh duk mai a, Bayern supporter pakhat chuan instagram lamah, "Vawiin chu kan team kan puih angin kan pui thei lo, medical team-in mi pakhat an buaipui vang a ni. Sport ai chuan nunna a hlu zawk a ni, a chhungte leh a thiante'n chakna thahrui an neih zel theih nan duhsakna ka hlan e," tiin a tarlang.

Bayern Munich pawhin thuchhuah an siam nghal a, "FC Bayern-in si khat faia Benfica kan hneh tum khan thu lungchhiatthlak tak kan hria. Entu mipui zingah medical team-in an enkawl ngaiin pakhat a awm. Sudkurve lama awm te pawhin an thawm an tizawi nghe nghe a ni.

"Inkhelh zawh darkar khat hnu velah thu lungchhiatthlak tak kan dawng a, kan fan pakhat chu damdawi in panpui a nih laiin a boral a, FC Bayern chuan kan tuar tak zet a, a chhungkhat laina te kan tawrhpui bawk," tiin.