2019-20 UEFA Champions League chu khelh zawh a ni ta a, final-ah German heavyweight Bayern Munich chuan French heavyweight Paris Saint-Germain chu si khat faiin an hneha, Champions League-ah a vawi ruk nan an champion.
Ti hian Bayern hi DFB-Pokal leh Bundesliga-ah te an champion bawka, Champions League nomawi chawi lehin, treble champion an ni.
Final inkhela goal awmchhun hi, Bayern winger Kingsley Coman-a khung a ni a, ani hi PSG player hlui a ni.
Inkhel a hmuhnawm hle a, a tir atangin team hnihte an innawra, chance tha tak tak hmuh tur awm nghal mahse goal erawh an khung hleithei lova, Bayern goalkeeper Manuel Neuer che tha hle in, goal an chhuah loh chhanah hian a thawhhlawk hle.
PSG lamah Neymar leh Mbappe te khel chhe hran lo mahse goal hmaah an hriam tawk lova, goal an khung thei lo tluana, an tlawm zui ta bawk.
Bayern hian a tir lamah goal chhuah teuh thin hle mahse an insiamrema, team inkhairual tak an ni tih lan tir nawn lehin, an tlo a, an squad a chhah tha bawka, a tawp thlengin an tang mar thei.
PSG-in bul an tan tha zawka, an khel pawh a dika, Bayern hian ball duh angin an chang hleithei lo. PSG lam an hlauhawm thin hlea, 15mins vel khelh a nihin chance an insiam nual tawha, mahse Manuel Neuer an tihbuai hma in Bayern defence lamin an lo block hlauh thin.
20mins khelh a nih hma hretin PSG lamin chance tha em em an neia, Neymar chu chung veilamah hlauhawm taka ball pek ni mahse, a shot chu Neuer-a’n a lo save a, Neymar hian ball chhuak tur chu pass luh leh tum mahse Neuer bawk chuan a lo dak sak leh.
20mins chuang hret an khela, Bayern lamin an ti goal teuh hle; Lewandowski chu veilam atang box chhungah ball pek a ni a, inherin, goal-ah a shoot, Keylor Navas chuan a ban pha lo, mahse si ban a pera, Bayern an vanduaiin, PSG an vannei hle.
PSG-in Bayern an nawr ve leh nghala, counter attack-ah hlauhawm hle in, Di Maria chuan chance tha tak nei mahse a ke hman thiam loh lama pet a ngai bawk nen goal zawnah pet lovin, a pet over luah. Jerome Boateng a inhliam zuia, lakchhuah niin a aiah Sule dah luh a ni.
Darkar chanve an khela Bayern lamin chance tha tak an nei leh, dinglam atanga ball lo kal chu rem lo takin Lewandowski chuan a lo tauha, goal teuh hle mahse Navas chuan a lo nam chhuak. Half time hma lawkin PSG lamin chance tha em em an insiama, Ander Herrera chuan box chhung atangin a piah lawka awm Mbappe a pe a, Mbappe hian goal a khung ngei tura ngaih a nih laiin, a pet chhe hle a, Neuer chuan awlsam takin a save. First half-ah hian team hnihte atangin chance tha tak tak hmuh tur tam hle mahse, goal khung thei an awm lova,0-0 in tihtawp a ni.
Bayern tan Thiago Alcantara a khel tha viaua, midfield-ah a che vel a hmuhnawm leh peka, PSG lamah Marquinhos khel tha in, langsar vut si lovin, PSG player tangkai ber a tih theih hial awm e.
Second half an tana, team hnihte intum tawk leh viauin, Bayern khel a dik chho hle a, darkar khat vel khelh chiah chiah khelh a nihin hma an hruai nghe nghea; Joshua Kimmich chuan box pawnah ball changin, tha em em in box chhungah ball a vawrh lut, far post lama changtu mumal neilo Coman chuan goal-ah lo tauh lutin Bayern hma a hruaipui. Bayern khel a dik chho tulh tulha, goal an khung hnu lawk pawh hian chance tha tak tak an insiam zui leh nghal.
70mins vel khelh a nihin PSG hian chance tha tak an nei a, mahse Neuer bawk chuan tha takin a lo save leha, world-class keeper a nih zia kan hmu nawn leh. PSG lam hian an si phurh sut an tum hle a , mahse team in khairual tha tak leh squad nei chhah tak Bayern an paltlang hleitheilo. Injury time lam thleng PSG hian chance nei mahse Bayern an khawng tluana, 1-0 hian inkhel tawpin, Bayern hian a vawi ruk nan Champions League title an la ta a ni.
PSG 0-1 Bayern Munich
(Coman 59’)
Player Ratings
BAYERN MUNICH: Neuer 8; Kimmich 8, Boateng 6, Alaba 7, Davies 7; Thiago 8, Goretzka 7; Gnabry 7, Müller 7, Coman 8; Lewandowski 7. Subs: Sule 7, Perisic 6, Coutinho 6, Tolisso n/a.
PSG: Navas 6; Kehrer 6, Thiago Silva 7, Kimpembe 6, Bernat 7; Marquinhos 7, Herrera 7, Paredes 6; Di Maria 7, Neymar 7, Mbappe 7. Subs: Verratti 6, Draxler 6, Kurzawa n/a, Choupo-Moting n/a.
