Paris Olympics 2024-a Turkey shooter Yusuf Dikec chuan internet khawvel a luah hneh hle. 

Lens emaw mit siaina emaw a hmang ve lo a, beng hnawhna a hmang bawk hek lo. A rawn ding chhuak a, a kap miah miah mai. 

Mi thenkhat chuan 007 te an ti a, "Turkey hian HITMAN dik tak an rawn tir a ni," ti tein an comment bawk.

A kut veilam chuan a ipte a zen than a, hahdam takin a kap, mi thenkhat chuan John Wick te pawh an ti hial bawk.

Kum 51 mi Yusuf Dikec hian Paris Olympics-ah hian a team-mate nen silver medal an hlawhchhuak.

Dikec hi sipaia tang thin a ni a, pistol events hrang hrangah record a lo siam tawh thin. Kum 2006 khan Norway-a CISM Military World Championships an neih tumin world record a lo siam tawh bawk a ni.

Bangkok-a 2012 ISSF World Cup Final-ah khan bronze medal a la a, 2012 summer olympics-ah pawh a tel tawh bawk. Croatia-a 2013 European Shooting Championships neih tum khan gold medal pahnih a hlawhchhuak bawk.

2021 European Shooting Championships-ah khan bronze medal a la a, kumin Olympics-ah Serbia team dawtah awmin a team-mate Şevval İlayda Tarhan  nen silver medal an hlawhchhuak a ni.