Europe lama football player sawi rik ngun ber pawl chu Benfica midfielder Enzo Fernandez hi a ni. A chhan lian ber chu 2022 Qatar World Cup vang kha a ni ber a, Argentina tan a khel that em avangin amah duhtu hi an tam hle. Ani bakah hian England leh Borussia Dortmund midfielder Jude Bellingham pawh hi tunlaia hming ri ring ber pawl a ni ve bawk.
Kum 21 a upa Fernandez hian tun season chhungin a club khelhna Benfica leh an ram Argentina tan inkhelin a buai ve hle a, mi tam takte mit hmuhah inelna sang ber pawh tha takin a khel thei tih a lantir. Tun season chhungin a khelhna league lama an goal thun vawi 4 ngawtah a inrawlh der tawh a, Champions League lamah pawh group-stage leh qualifying round-ah Benfica goal thun vawi 4 ngawtah inrawlhna a nei tawh bawk.
Hengte hi kumin July thlaa River Plate atanga Benfica a zawm hnu lawka a hnu-hmate an ni a. Fernandez hian Benfica hi zawm ve chauh mah se season khat vel bak a cham a rinawm vak lo. Tuin nge lei thei ta ang le?
Chelsea
Chelsea hian central midfielder tur an zawng kual mek a, chung zingah chuan Jude Bellingham leh Enzo Fernandez te hi hming ri ring ber pawl an ni. Graham Potter-a’n a enkawl hnuah Jorginho leh Mateo Kovacic te’n club-a an hlutna an hloh telh telh a, N’Golo Kante lahin club chhuahsan a lo rilruk deuh tawh bawk si.
Chuvang chuan Chelsea hian an midfield a kim lo awmte hnawhkhah nan Fernandez hi an club-a hruai luh ngei an duh a ni.
Manchester United
Spain leh Argentina lama chanchinbu mite chuan Enzo Fernandez lei duhtu te zingah hian Manchester United hi an khan ber niin an tarlang a. Mahse, United midfield ah hian Christian Eriksen emaw Casemiro te pahniha a tu emaw zawk zawk a nekchhuah a ngai dawn a, a nih lo vek pawhin Casemiro dinpui tur midfielder ball keng thei an duh.
January thla chhung hian striker thar an lei lo a nih chuan nipuiah hian an pawisa neiha a tam zawk hi chu striker thar lei nan hman an tum a, mahse Fernandez lei nan hi chuan an hman banin a la daih zan a rinawm tho.
Real Madrid
Real Madrid pawh hian Jude Bellingham emaw Enzo Fernandez te bawk hi an team-a khel turin an duh ve bawk a. An midfielder tha leh rinrawl ber Luka Modric leh Toni Kross te an kum a tam ve tawh avangin an tel loa an khelh a ngai vat dawn, anni pahnih hi season lehah emaw a lehpekah chuan an chhawr theih a rinawm vak tawh lo.
Aurelien Tchouameni leh Eduardo Camavinga te squad ti chak turin an la nei a, khelmual laia anni pahnih tha taka suihzawm thei tur hian Fernandez hi a tangkai ber turte zing ami a ni.
Liverpool
Liverpool pawh hian Real Madrid te ang bawkin an midfielder pahnih Jordan Henderson leh Thiago te’n chuai lam an pan ve telh telh avangin midfielder thar la naupang tak an dap ve mek a.
Anni erawh hi chuan Fernandez ai mahin Bellingham lam an awn mah zawk a, mahse Bellingham hi an la lut thei lo a nih erawh chuan Fernandez hi an hmachhawp dang ni tura an hual lai mek a ni.
