November thla tawp hian Paul Pogba chuan Juventus a chhuahsan dawn a, Italian club-ah hian contract la nei mah se, inhriatthiam tawnna hmangin contract an titawp dawn ta a ni.

Anti-doping test a paltlang loh avangin Pogba hi kum 4 chhung hrem a ni a, mahse kum 31 mi hian  Court of Arbitration for Sport (CAS)-ah a khing let a, a hremna chu thla 18-a tihtawi sak a ni.

Hrem a nih atang khan thla 13 lai a liam ta a, hetia a hremna tihnep sak a ni avang hian January 2025 atang chuan Juventus-ah training a nei tan leh thei tawh dawn a, March 2025-ah a inkhel leh thei tawh ang. Pogba hian kum 2026 June thla thleng Juventus-ah contract a nei a, mahse Juventus chuan Pogba-a contract hi tihtawp sakin, November ni 30 hian Old Ladies a chhuahsan dawn ta a ni.

Juventus chuan November ni 30-a Pogba-a contract an tihtawp dawn thu an tarlan bakah, a kal leh zelna turah duhsakna an hlan bawk.

A hremna tihnep sak a nih hnu lawk khan Pogba chuan, "Mual chhunga inkhelh leh ka chak tawh kher mai. Hmana Pogba tho kha ka la ni a, chak duhna thinlung pu mi leh inkhelh phur em em kha ka la ni reng.

"Ka inkhelh theih loh chiah khan hrehawm ka ti em em a, inkhelh leh vat vat ka chak a, mual chhunga chet tlat hi ka tan a hluin a pawimawh a ni," tiin a sawi.