Barcelona chuan an captain Lionel Messi chu contract thar an ziahpui thei tep tawha, tun kar chhungin Messi hian Camp Nou-ah contract thar a ziah a beiseiawm thu Sky Sports chuan a tarlang.

Copa America-a Argentina a champion pui hnuah Messi hian chawlh a hman rei deuh avangin Barcelona-ah a la kir lova, tunah hian kir leh dawn tawhin, contract tharin a lo hmuak dawn niin a lang.

Kum 34 mi Messi hian June thla ral rual khan Barcelona-a a contract a hmang zo va, thla khat vel zen zawn free agent a nih hnuah Barcelona player a ni leh dawna, kum 2026 June thla thleng daih contract thar a ziak dawn nia sawi a ni.

Thla hmasa khan Barcelona leh Messi te hi a thuphung chuan contract thar chungchangah inremna an nei tawha, Messi hian a hmaa a hlawh chu 50%-a tihhniam remtiin, hemi hi Barcelona nena an inrem theih chhan ber niin chanchinbu te chuan an tarlang.

Barcelona hi an player te hlawhah sum an sen hnem em avangin an inpaih thawl mek zela, player an chhuah tir nual tawha, midang pawh chhuah tir tur an la nei nual niin a langa, Messi erawh an player pawimawh ber a ni chhunzawm zel dawn a ni.