Chelsea manager Thomas Tuchel chuan Manchester United striker Cristiano Ronaldo chu lakluh a duh loh avangin, Chelsea chuan Ronaldo hi an dawr dawn lo tih The Athletic chuan a tarlang.

Ronaldo hian tun nipui bazar chhungin United a chhuahsan duh a, United hotu te hnenah pawh a chhuah duh thu hi thlen a thlen tawh.

Ronaldo-a agent Jorge Mendes chuan Ronaldo hi club lian dangah a zuar kual a, chung zingah chuan Chelsea pawh hi an tel ngei a, mahse Ronaldo hi Stamford Bridge-ah a lut dawn lo a tih ngam.

Mendes hian kum 37 mi hi Paris Saint-German leh Bayern Munich hnenah pawh a zuar nia sawi a ni a, mahse PSG leh Bayern te hian Portugal captain hi lakluh an duh lo tih Mendes an hrilh ve ve tawh.

Chelsea neitu te leh Mendes te hian inbiakna an nei hman ngei a, mahse transfer lama thu tawp siamtu Tuchel chuan Ronaldo hi a duh loh avangin, Chelsea hian an bawhzui dawn lo nia sawi a ni.