MMA heavyweight fighter ropui ber tia sawi hlawh, Russian mixed martial arts fighter Fedor Vladimirovich Emelianenko chu September 28, 1976 ah khan a piang a. Sambist leh judoka a nih bakah politician pawh a ni tel bawk.

Kum 2 a nihin a pianna Rubizhne, Luhansk Oblast, Ukrainian SSR, Soviet Union atangin an chhungkuain Stary Oskol, Belgorod ah an pem a. A nu Olga Fedorovna chu zirtirtu niin, a pa Vladimir Alexandrovich chu welder a ni.

Fedor Emelianenko hian kum 11 a nihin Vasily Ivanovich Gavrilov kaihhruaina hnuaiah Russian martial arts chi khat sambo a zir a, judo pawh a zir tel bawk a. Kum khat hnuah coach Vladimir Voronov zirtirna hnuaiah a lut zui a, a coach hian Fedor chu naupang dangte aia danglamna a awm loh thu sawiin, a hlawhtlin chhoh chhan ber chu a taimakna leh tumruhna vang liau liau a nih thu a sawi.

1991 kumah khan Fedor chuan high school a chhuahsan a, electrician ni turin a inzir zui a, 1994 kumah khan a graduate a. 1995 atanga 1997 chhungin Russian Army-ah sipai kangthelhtu angin a awm a, chu mi hnuah Nizhny Novgorod bulah tank division member a ni ve leh a. Hetih lai vel hian a nu leh pa an inthen.

1997 kumah Emelianenko hian judo leh sambo ah te ‘Master of Sport’ certificate a dawng a, Russian national team ah a tel bawk a. 1999 leh 2000 chhung khan judo inelnaah vawi 12 a chak a, vawi 7 chu a chak lo zawk a ni.

Sum lamah harsatna a nei chho a, 2000 kumah khan Russian national team atangin a chhuak a, pawisa a neih theih zawk ringin mixed martial arts lamah a zuang lut tan a. A tan chuan pawisa neih theihna kawng dang inhawng chu Russian mafia ho hnuaia luh a, mi rikraptua tan a ni leh mai.

Ngenna : Website-a ads rawn lang hi min lo click sak ve thin dawn nia.

Mixed martial arts huangah hian May 21, 2000 atangin a zuang lut tan a, a zawnin vawi 4 a chak chho nghal nghe nghe a. December 2000 ah khan sawisel hlawh deuh maiin a vawi khatna atan a chak lo a. Tsuyoshi Kohsaka nen an inhmachhawn a, second 17 chauh an insual hman tihin Fedor-a lu kak vangin doctor in a titawp ringawt a ni.

He mi hnuah hian chak loh a nei lo chho ta ngar ngar a, June 2010 thlengin vawi 28 chhung chu hnehtu an awm lo a. He mi hun chhung hian UFC champion hlui 4 a hneh bakah PRIDE champion pakhat, K-1 champion hlui pakhat leh a hnu lama K-1 champion ni chho thei pahnih a hneh bawk a, Olympic medal dawng thei pahnih pawh a hneh bawk.

Heavyweight huanga a chet that theih em avangin ‘The Last Emperor’ tih hming lem an puttir hial a, a hneh zingah hian Antonio Rodrigo Nogueira, Mirko Cro Cop leh Mark Hunt te pawh an tel a. Pride Fighting Championships, Strikeforce leh Bellator MMA ah te a inhnamhnawih hman a ni.

June 2012 ah khan professional mixed martial arts a chawlhsan thu a puang a, Pedro Rizzo nen an insual a, first round minute 2 hmain Fedor hian a insualpui chu a knockout a, a chawlh thu hi a puang zui a ni.

Kum thum chhung a chawlh hnuah December 2015 ah khan mixed martial arts lamah a kir leh a, boruak pawh a nei tha chho leh hle a. February 4, 2023 ah khan Bellator 290 a awm a, Bellator Heavyweight World Championship-ah Ryan Bader nen an insual a, hetah hian Fedor chu first round-ah TKO in a chak lo nghal a, MMA chu a chawlhsan zui ta tak tak a ni.

A hun laiin Fedor Emelianenko hi vawi 48 a insual hman a, hengah hian vawi 40 ngawt mai a chak thei a, vawi 7 chu a chak lo zawk niin, vawi 1 chu no contest a ni a. Mi 16 chu a knockout a, submission hmangin mi 15 a hneh a, decision hmanga a hneh chu 9 an ni a. A chak loh danah hian vawi 6 chu knockout niin, submission hmangin vawi 1 chu a chak lo bawk.

Fighter rothap em em mai a ni bawk a, UFC Hall of Fame leh Bellator Hall of Fame ah te lak luh niiin, MMA khawvelah chuan a hming hi a dai thei mai tawh dawn lo a ni.

UFC President Dana White chuan Fedor hi UFC contract ziahpui tumin hma a la fo a, "Fedor hi ka atchilh a, UFC ah rawn lut ngei se ka duh a ni tawp. Amah ngaisangtute’n UFC luhchilh tura an duh aiin ka duhna hi a nasa zawk," a ti hial.

Emelianenko hian Dana White sawmna hi a pawm a nih chuan UFC Heavyweight champion Brock Lesnar nen insual nghal tura ruahman a ni a. Sum pawh White hian a tawktarh lian hle a, $2 million bakah pay per view atanga lak luh nei tel turin a thlem a. Emelianenko management team lampang chuan chutiang hmain UFC leh M-1 Global thawh dun an lo phut tlat mai a, hei hi Dana White chuan a pawm thei ta lo a, Fedor chu UFC huangah a luh loh phah ta a ni.

Inrem thei lo mah se Dana White chu a la beidawng duh mai lo a, 2012 kumah khan Fedor chu thlem chhuah a tum leh a, a hlawhtling thei ta chuang lo a. Khawvela fighter ropui berte zinga mi ni siin Fedor Emelianenko chu UFC huangah a tel ve ta miah lo a ni.