English professional footballer ni thin, football coach ni zui ta Alan Smith hi October 28, 1980 ah khan a piang a. A naupan lai atanga football ngaina em em niin, an khaw club Leeds United ah bul a tan a ni.
Kum 18 a nih kumah professional football a khel tan a, Premier League match a khelh hmasak ber chu Anfield-ah niin, Liverpool an luhchilh a. Substitute bench atangin Alan Smith hi an luhtir a, a luh atanga minute 3 lekah, goal lama ball a pet hmasak berah goal a thun nghal a, player theuneu lo tak a nihzia a lantir nghal a. He mi season chhung hian game 16 khelhah goal 9 a thun thei a, mi hriat a hlawh chho tan nghal.
Leeds United chuan a thiamna an hre chiang bawk a, an chelh zui zel a, khatih laia manager David O’Leary khan tlar hma lamah Jimmy Floyd Hasselbaink nen a chhawr rim hle a. Striker leh right winger anga khelin Elland Road-ah kum 7 chhung chu hun a hmang a, striker angin a khel nasa ber a. Leeds tan hian game 172 khelhah goal 38 a thun hman a, yellow card 56 leh red card 8 a hmu hman bawk.
2004 kumah khan Leeds United an che fuh lo a, Premier League atangin Championship lamah an tla a, Alan Smith chuan £7 million in Manchester United a zawm phah a. United tana a game hmasa ber chu August 8, 2004 ah a khel a, Arsenal nen Community Shield an inchuh a. Minute 55 ah Alan Smith hian goal a thun a, 1-3 in an chak zo ta lo thung.
League lama a goal hmasa ber chu Norwich City lakah minute 49-naah a thun a, Manchester United a chakpui a. Goal a thun hma hian David Bellion goal thun tur pawh a siamsak bawk a ni.
A club tharah hian manager Alex Ferguson chuan holding midfielder angin a khelhtir nasa a, beisei pha lo tia sawi pawh a hlawh viau nghe nghe a. 2006 kumah khan Liverpool nen an inkhelh tumin a ke ruh a ti khawlo a, a inhliam nat deuh avangin thla eng emaw zat chu a inkhelh theih loh phah a. Manchester United tan hian game 61 khelhah goal 7 chu a thun hman.
August 2, 2007 ah khan £6 million vel bawrin Newcastle United a zawm a, a game hmasa berah Sampdoria nen friendly match an khel a, goal thun nghalin 1-0 in a club thar chu a chakpui a. Magpies tan hian game 84 khelin goal a thun miah lo a, loan in Milton Keynes Dons a zawm a, hetah hian game 16 khelhah goal 1 chu a thun.
January 12, 2012 ah khan Milton Keynes Dons chu a nghetin a zawm a, game 51 khelhah goal 1 a thun a. 2014 atanga 2018 thleng khan Notts County chu player-coach angin a zawm leh a, game 87 khelin goal a thun miah lo a ni.
England U21 tan game 10 khelhah goal 3 a thun a, England B team tan game 1 khelin goal 1 a thun bawk a. England senior team tan game 19 khelhah goal 1 chu a thun bawk a ni.
Alan Smith hi Orlando, Florid lamah awmin XL Soccer World Academy ah coach angin a awm a, mipa naupang leh hmeichhe naupangho football khelh a zirtir thin a ni.