Rei tak chhung a chawlh hnuah Jadon Sancho chu training-ah lo kir leh tawh mah se Carabao Cup-a Nottingham Forest an hmachhawn turah a inlan loh tur thu Erik ten Hag chuan a sawi.

Nikum October ni 22-a Chelsea nen 1-1 a an inhnehtawk tum kha Sancho-a'n United tana a khelh hnuhnun ber a ni a, khami hnuah khan damlohna avangin a la chawl char char. 

£73m-a an lak luh hi khel tura a la fit tawk loh thu Ten Hag chuan a sawi a, rilru lamah harsatna a neih thu a sawi tel bawk. A fitness siam tha turin mi mala training pek a ni a, kar hmasa khan first-team training pawh a zawm chauh a ni.

Premier League hmahruaitu Arsenal an hmachhawn tum pawh khan Sancho hi chhawr a ni lo a, Forest an hmachhawn hunah pawh hian risk lak chi a la nih loh thu Ten Hag chuan a sawi.

"Arsenal game-a tel lo player, Diogo Dalot, Anthony Martial leh Sancho-te chu naktukah pawh an remchang dawn lo," tiin United boss chuan a sawi.

Carabao Cup hi kum 6 hnua United-in trophy an beisei leh hmasak ber a ni a, Forest an hneh a nih chuan final an lut ang a, Newcastle United leh Southampton chak zawk zawk an hmachhawn dawn a ni.

"Trophy lak chung chang a ni a, hun remchang tak kan nei. Leg 2 khel tur kan nih avangin leg hmasa zawkah kan insawrbing phawt a ngai a, kan hmabak kan ngaihtuah thui lutuk chuan min tibuai mai mai. Naktuk atana kan tum ber chu chak a ni.

"Trophy lak hi thil lawmawm tak a ni. Ka career-ah hian ka vannei a, trophy ka la thei phian. A bik takin fan-te tan a ropui a, hun hma lamah khan trophy chawi kawnga tawnhriat nei an lo awm ve nual tawh. 

"Tun hnaiah United hian trophy kan la thei meuh lo a, khatiang thil kha a thlen leh kan hlau, chuvangin a hma ang kha nih leh kan tum," tiin Ten Hag chuan a sawi a ni.