Julian Nagelsmann chu zirtawpni khan Bayern Munich chuan an ban a, a hmunruak luah tur hian Dortmund boss hlui Thomas Tuchel chu an la lut nghal.

Season hmasa khan Nagelsmann hian Bayern Munich chu Bundesliga title a lakpui, tun season Champions League-ah pawh tha takin an khel chho ngar ngar.

UCL lamah chuan an khingpui te an la hneh vek a, quarter final an inpet kai, quarter final-ah Manchester City nen an inhmachhawn dawn a ni.

Bundesliga lamah erawh kumin an che tha lo, point an hloh nasa a, Borussia Dortmund chuan point khatin an lehpel ta. League lama an chet that loh avangin Bayern Munich chuan an boss hi an ban ta nia ngaih a ni.

Tottenham lam pawhin manager thar an zawng mek nia report a ni a, press conference a neih hnuhnung berah khan Antonio Conte chuan club neitute leh player te a sawisel nasa. 

Tun season bak Spurs-a contract nei tawh lo Conte hi London club hian contract thar an zawrh a rinawm tawh loh. Heng te a nih avang hian coach thar tunah hian an zawng mek nia report a ni.

Coach naupang leh tha tak Nagelsmann a lo awl hlauh bawk nen. Tin, kum 2019 khan Daniel Levy chuan Nagelsmann hi an lo dawr tawh nia report a ni bawk a.

Pochettino-a'n a chhuahsan hlim khan Spurs chuan Nagelsmann hi an lo dawr tawh niin a lang a, tunah hian an dawr nawn leh dawn niin thu a thang mek a ni.