Tottenham chuan manager thar an nei thuai dawn niin a lang a, Celtic manager Ange Postecoglou chu a thupungin inremna an neihpui tawh thu chanchinbu mite chuan an tarlang.

Tottenham hian manager hrang hrang an dawr kual tawh a, Bayer Munich manager hlui Julian Nagelsmann, Barcelona manger hlui Luis Enrique, Brighton manager Roberto de Zerbi leh Fulham manager Marco Silva te chu an dawr hlawhchham vek tawh niin chanchinbu mite chuan an ziak.

Tottenham hian Eredivisie-a Feyenoord champion puitu Arne Slot pawh lakluh tum viau mah se, kar hmasa khan Slot hian Feyenoord-a a awm zel tur thu sawiin contract thar a ziak zui bawk.

Kumin March thla khan Tottenham hian Italian manager Antonio Conte an ban a, hemi hnu hian Cristian Stellini chu an interim manager atan an chhawr chhunzawm. Stellini pawh hi ban ve lehin, Ryan Mason-a enkawlna hnuaiah season an hmang zo a, Mason hi tun season tawp thleng bak an chhawr dawn lo.

Tottenham hian an manager nghet tur an la be fel thei lova, mahse tunah erawh tun season-a Scottish Premiership, Scottish Cup leh Scottish League Cup-a Celtic champion pui tu Postecoglou hi an la thei dawn niin a lang.

Postecoglou hian Celtic hi game 113 a khelhpui tawha, vawi 83 ngawt hnehna chanpui tawhin, tun season-ah Celtic hi kum 57 mi hian domestic treble champion a nihpui a ni.