Premier League club Tottenham chuan Everton in an chhawr tam loh Ben Godfrey chu, January thla-a thlasik bazar a inhawn hunah dawr an tum tih talkSPORT chuan a tarlang.

A inhliam bawk nen English defender hi tun season-ah a la inkhel mang lova, Premier League-ah Everton tan vawi khat chiah a la inlan a, Everton pawh hian a phu tawka dawrtu an hmuh chuan chhuah tir mai an hnial lo nia sawi a ni.

Tottenham hian player inhliam an ngah a, a bikin defence lamah indaih loh chang an nei fo a, an manager Ange Postecoglou chuan an tlarhnung thawm that ngei a duh avangin thlalehah North London club hian defender lakluh tur an melh dawn niin a lang.

Tottenham hian Bournemouth defender Lloyd Kelly pawh an ngaihven a, Kelly hian Bournemouth-ah hian tun season daih chiah contract nei tawh mahse Cherries hian an defender January thla-a hralh an phal lo niin chanchinbu mite chuan an ziak.

Tottenham hian centre-back veilama khel tur lakluh an dah pawimawh ber dawn nia tarlan a ni a, Kelly an beisei theih loh avangin Godfrey-a lam an hawi a rinawm hle.

Everton hian Godfrey hi kum 2020 khan Norwich City atangin an lei a, a manah pound maktaduai 20 bakah add ons an seng a, pound maktaduai 15 bawr velin an hralh phal a rinawm viau a ni.