Everton chuan Goodison Park-ah Tottenham Hotspur an lo mikhual a, mikhual huangtau Spurs tan Son Heung-Min leh Harry Kane te chuan goal hnih ve ve thunin Tottenham chu 6-2 ngawtin an chak a ni.
Mual neitu Everton hi Premier League club chungnung paruk an hmachhawn hnuhnung 22 ah an la chak miah lo a, vawi 6 an inhnehtawk a vawi 16 chu an tlawm tawh a. Heng team laka an chak hnuhnun ber chu January 2017 kha niin, Manchester City chu 4-0 ngawtin an hneh a ni.
Marco Silva chuan kar hmasa Inrinnia Manchester City an hneh loh tuma a khelhtir pahnih chu a thlak danglam a. Yerry Mina leh Bernard te chu substitute bench-ah a thuttir a, Theo Walcott leh Tom Davies te chu bul a tantir thung a ni.
Mauricio Pochettino chuan EFL Cup quarter final-a Arsenal an hneh tuma a khelhtir pathum chu a thlak bawk a. Hugo Lloris chu goal a ventir a, Harry Kane leh Davinson Sanchez te pawh bul a tantir bawk a, Paulo Gazzaniga, Danny Rose leh Lucas Moura te chu substitute bench lamah a awmtir thung.
Everton (4-2-3-1): Jordan Pickford; Kurt Zouma, Michael Keane, Seamus Coleman, Lucas Digne; Tom Davies, Andre Gomes; Richarlison, Gylfi Sigurdsson, Theo Walcott; Dominic Calvert-Lewin
Subs: Morgan Schneiderlin, Oumar Niasse, Yerry Mina, Leighton Baines, Maarten Stekelenburg, Cenk Tosun, Bernard
Tottenham (4-2-3-1): Hugo Lloris; Davinson Sanchez, Toby Alderweireld, Ben Davies, Kieran Trippier; Moussa Sissoko, Harry Winks; Son Heung-Min, Dele Alli, Christian Eriksen; Harry Kane
Subs: Kyle Walker-Peters, Juan Foyth, Oliver Skipp, Danny Rose, Lucas Moura, Erik Lamela, Paulo Gazzaniga
Everton hian Premier League-ah game 4 chu chak hmel an hmu tawh lo a, November thla khan Cardiff City chu 1-0 in an hneh a, hemi hnu hian eng club mah an la hneh leh lo a. Tottenham ve thung chu inelna hrang hranga an khelh hnuhnun match 5 ah an la tlawm miah lo a, vawi 4 an chak a, vawi 1 chu an khingpuite an draw a ni.
Inkhel an tan a, Everton chuan bul an tan tha pangngai hle a, goal thun hmasa zawk nih tumin an innawr tawn nghal vat a.
Mual neitu Everton tan lawmna hun a inher chhuak hmasa a, minute 21-ah Gylfi Sigurdsson chuan Dominic Calvert-Lewin chu ball a pe a. Calvert-Lewin hian Spurs box lamah ball chu a pet phei a, hei hi Theo Walcott chuan goal-ah chuan a lo thun a, Everton chu hma a hruaipui a ni.
Theo Walcott hian Premier League-ah Tottenham laka goal 5 a thunna chiah a ni a, team mal laka goal a thun hnem ber dawttu niin, a thun hnem ber chu West Ham lakah niin, goal 6 a thun tling tawh a ni.
Everton an lawm rei lo hle a, minute 27-ah Tottenham chuan goal an thun ve leh nghal vat a. Jordan Pickford chu box pawnah tlanin ball chu pet chhuah a tum a, mahse Kurt Zouma nen an inringthul a, ball chu Son Heung-Min chuan a la a, goal-ah chuan thunin mikhual team si phurh chu a sut theih phah a ni.
Goal luh hnu hian Everton chuan hmahruaitu nih leh theih tumin tan an la a, ball pawh an chang tam hle. Mahse, Spurs bawk chu a che fuh zawkah an tang zui leh a, minute 35-ah Son chuan goal lamah ball chu a pet a, hei hi Pickford chuan a lo dang a. Heta ball let leh hi Dele Alli chuan a lo thun a, Tottenham chuan 2-1 in hma an hruai ta a ni.
Spurs chu an hlauhawm belh zel a, minute 42-ah free kick an hlawh a, hei hi Trippier chuan a pet a. Ball chuan goal ban a fuh a, heta ball let leh hi Harry Kane chuan lo thunin 3-1 in hma an hruai zui a ni.
Half time thlengin goal dang a awm belh ta lo a, chawlh lawkah mikhual team Tottenham chuan 3-1 in hma an hruai a ni.
Second half an tan leh a, rei pawh an khelh hmain goal a lut leh nghal der mai a. Minute 48-ah Christian Eriksen chuan Spurs goal 4-na a thun a, 4-1 in hma an hruai ta der a ni.
Minute 51-ah Everton chuan goal an thun zui ve leh nghal a, Gylfi Sigurdsson chuan Richarlison ball pek chu lain Spurs defender pahnih paltlangin Lloris man theih lohin goal hi a thun a, Everton hian 2-4 in an mikhualte chu an la um ta tho a ni.
Minute 61-ah Lamela chuan Son chu ball tha zet mai a pe a, hei hi Son chuan Everton goal-ah chuan lo thunin Tottenham chuan 5-2 in hma an hruai theih phah a. Son Heung-Min hi Spurs tana game 112 khelhah Premier League goal 50-ah a inhnamhnawih tawh a, vawi 35 a thun a, vawi 15 chu mi goal thun tur a siamsak tawh a ni.
Mikhual team te hian an la duhtawk mai lo a, minute 74-ah goal hnih thun tawh Son chuan Harry Kane chu ball tha zet mai a pe a, Kane hian a goal hnihna a thun ve theih phah a, Tottenham chuan 6-2 ngawtin hma an hruai theih phah bawk a. Kane hi Premier League club pakhat lakah a zawnin match 4 chhung goal hnih chin thun thei hmasa ber dawttu niin, Michael Owen kha hetiang ti thei hmasa ber hi a ni a, Newcastle United lakah August 1998 leh May 2001 inkar khan a lo thun tawh a ni.
Goal dang a luh belh tawh lo a, hun tawpah Tottenham chu 6-2 in an chak a, pathumnaah la awm mahse an chung chiaha mi Manchester City nen an inkar a zim ta hle a. Palinaa awm Chelsea nena an inkar pawh a zau phah sawt bawk a. Tottenham hian Premier League record ding lai chu an nihrual ta chiah a, season bul tan atanga draw nei miah loa awm rei ber an ni ve ta a. Tun season-ah game 18 khelhah vawi 14 an chak a, vawi 4 an tlawm tawh a ni.